E toafitu le Au Siisii Uamea Mamafa a Samoa o le a fai ma ave fua o lo tatou atunuu i taaloga o le a faia i Initia.
O le saunoaga lea a le afioga ia Tuaopepe Asiata Jerry Wallwork, le faiaoga ta’iulu lauiloa a Samoa lea sa faauuina iai le Ofisa o le Poloā’iga a Samoa (Officer of the Order of Samoa) ia Iuni 2023.
Saunoa le Peresitene o le Asosi Uamea Mamafa a Samoa (Samoa Weightlifting Federation), o i latou o le a masii atu, e aofia ai:
* Lesila Fiapule — 87 kg
* Iuniara Sipaia — 87 kg plus
* Vaipava Nevo Ioane — 67 kg
* John Tafi — 73 kg
* Maeu Nanai Livi — 96 kg
* Don Opeloge — 102 kg
* Sanele Mao — 109 kg
O Don Opeloge sa ia ausia le pine auro i Taaloga Faavaomalo a le Taupulega (Commonwealth Games gold medalist). Ae o le masina o Me 2023 sa ia ausia ai le tapulaa pito i luga (new Commonwealth Games record) mo le 102kg Clean n Jerk mo alii ma lana sii e 206kg.
O loo mamafa toleniga mo le tapena atu o le au siisii uamea mamafa a Samoa e pei ona masani ona faasoa mai ai le faiaoga ulu.
“O le toleniga muamua e usu i le 4 i le vaveao seia paia le itula e 7. Ona malolo lea ae toe amata toleniga i le 11 agai le 2 i le aoauli. Ona toe malolo foi lea, ae amata toleniga mulimuli i le 5 i le afiafi seia maea le itula e 8 i le po.”
O le Aso 10 Iulai 2023 o le a tu’uvaa ese atu ai le tatou ‘au siisii mo le taamilosaga e faia i New Delhi i Initia mo le tasi le vaiaso.
O lena taamilosaga ua faaigoaina o le Commonwealth Championships lea e faatino ai ni taamilosaga mo le Senior, Junior, Youth ma le Under 23.
O le Olympic qualifying foi lea e mafai ai ona ulufale atu mo le Olimipeka 2024 lea o loo fuafuaina mo Paris, Farani, Iulai – Aokuso 2023.
Saunoa Tuaopepe, “a maea le taamilosaga i Initia ona malaga mai lea e tapena mo tamilosaga ia Aokuso ua faaigoaina o le IWF Senior World Championship.
O le isi foi lea Olympic qualify e faia i Saudi Arabia.
E le gata ai i inā, ae e iai foi nisi taamilosaga tetele o loo i tua atu, e mafai ai foi ona qualify mo le Olympics.
Na saunoa Tuaopepe, e lē o malolo foi i latou o loo iai i le togalauapi mo tapenaga mo le taamilosaga a le Oceania Championship Juniors.
“E talimalo ai le tatou atunuu i le masina o Oketopa o le tausaga nei, lea e 22 atunuu o le a auai mai ai..”
“O loo iai le faamoemoe e lata i le 500 le ‘au taaalo o le a faatasi mai ai.
O loo faatuputupulaia pea le fuainumera o alo ma fanau o le atunuu ua agai atu i lea faagatama o le sisii uamea mamafa, ma maua ai avanoa e toleleni ai i lalo o le taitaiga a Tuaopepe.
“O le taimi nei, e silia ma le 40 le aofai o i latou o loo faamautu ma faaauau toleniga i le tatou nofoaga ua faaigoaina o le Samoa High Performance Weighlifting Training Centre.
“O lea togalauapiga, o loo faamautu ai foi ma sui o au siisii mai isi atunuu i fafo atu o Samoa.”
Na faafetaia e Tuaopepe, le lagolago a le faigamalo mo le fesoasoani atu i taumafaiga a le tatou au siisii, faapea le SASNOC, ae maise le lagolago atu o sponsor aemaise foi le lagolago a nai matua.
O le tatalo a Tuaopepe i le atunuu, “Ia manatua mai ia outou tatalo ma le tapuaiga, le alo faiva o alo ma fanau auā se ai mo Samoa.”
