Toafā ua Molia i le Faaoogalima na Tulai mai i Pesega

0
10148

E toafa nisi ua molia e leoleo i se faaoogalima na tula’i mai i Pesega lea sa maimoaina uma e le mamalu o le atunuu i luga o upega tafa’ilagi.

Ua molia uma ni alii se toafa i le faaoolima, faapea ma le moliaga o le faaoo o manu’a tugā.

Sa faamaonia mai lea tulaga e le Komesina o Leoleo, le afioga ia Auapaau Logoitino Filipo ina ua fesiligia o ia.

O le afiafi o le Aso Toanai 23 Mati sa tula’i mai ai lenei faalavelave i le auala tele i luma tonu o Pesega. O le te’a o le ono (6.13pm) sa logoina ai e nisi o le atunuu sa iai le 911 ma faanatinati atu ai loa le FESA (Fire and Emergency Services Authority).

O se piki apu paepae sa lipotia e nisi o molimau mai lena afiafi, na feosofi uma iai ni alii sa latou faatinoina lea soligatulafono.

Sa iloa atu i se ata video na pueina e se tasi o molimau, e tiga lava ona taatitia mai ua le toe minoi ni alii se toalua, ae takiki lava a latou tino e nei taulelea ao taooto i luga o le auala ma poloka ai le ala tele i taavale feoai.

Ua tatala uma i tua i latou nei e tālia ai le aso 9 Aperila e tulai ai i luma o le faamasinoga e tali atu i a latou moliaga.

I faamaumauga a leoleo, o lenei faalavelave na mafua mai ina ua lalafo e i latou na aafia ni upu mamafa ma upu māsoa ao feoai faasuaava i luga o le alatele.

O i latou na aafia e galulue faatasi i se faletalimalo, ma o le mae’a ai o galuega ua toe foi i aiga lea na tupu ai le faalavelave.

O le Aso 9 Aperila o le a tulai ai i latou ua molia e tali i o latou moliaga.