Toa Samoa: O le a Siitia le Fainumera o Malu o le Malo e Puipuia Fiafiaga a le Atunuu

0
280

O le a siitia le aofai o Malu o le Malo o le a galulue i le faaiuga o le vaiaso e tulimatai le puipuiga o le saogalemu ao agai mai le atunuu mo solo taavale e tapuai ai le Toa Samoa.

Na saunoa manino le Sui Komesina o Leoleo, Papalii Monalisa Tiai-Keti, e 873 le aofai o Malu o le Malo lea ua manatu le pulega o le a galulue uma mo le puipuiga o le saogalemu o tagatanuu o Samoa. O lea fainumera e aofia ai le auaunaga i Upolu ma Savaii.

O leoleo e masani ona malolo, o le a valaau uma e galulue mo le sauni atu o le mamalu o le atunuu e tapuaia le Toa Samoa lea ua sao atu i le suega siamupini a le ipu o le lalolagi.

Saunoa foi Papalii, o le auga ma le autu o lea fuafuaga o le puipuiga o le saogalemu, ona sa maitauina e iai laina poo lane sa faailoa atu e tatau ona faa’avanoa i luga o le auala e fua lea i faalavelave faafuasei, ae maise foi o ni gasegase e faanatinati atu i le falemai, poo taavale tineimu.

O le isi itu sq tuuina mai ai se lapataiga a le Sui Komesina o le maitauina lea o nisi o le atunuu o loo saofafa’i i luga o afi o taavale ma luga o fale o taavale faapea foi tua i pusa o taavale.

O le mafuaga lena ua manatu ai le matagaluega ua tatau ona faamalosia le puipuiga o le atunuu aua lava le saogalemu.

“E faamanino le tulaga o pemita, e na’o le tolu pemita na faamatuu atu ia i latou e faamaopopoina solo taavale, peitai ua maitauina le tele o nisi ua agai mai e aunoa ma se pemita, aemaise ua vaaia ai foi ma taavale e lei pasia faapea foi ma i latou e leai ni laisene ave taavale..”

Sa saunoa foi Papalii, e na o le Aso Toanai sa tuuina atu ai pemita, peitai, ua vaaia le toe agai ane o le atunuu i le Aso Sa i luga o le auala tele.

O le taeao pō o le Aso Sa, ina ua manumalo le Toa Samoa ia Egelani i se taaloga mataina tele, sa le mafai ai ona onosaia le alalaga o le atunuu e faaali le fiafia.

Sa sagisagi fiafia uma le toatele o le atunuu i le taulaga i Apia ma maitau ai le pepese, sisiva, faaee pu o taavale sei tulou, ma aga eseese uma e patipatia ai se matāti’a maoa’e e lei ausia muamua e soo se faagatama i le tala faasolopito o Samoa.

Paga lea ua fautua mai le Sui Komesina o Leoleo i le atunuu ia faataua le saogalemu aemaise ia usitaia aiaiga ma faamatalaga ua tuuina mai e le Matagaluega e mama ma faigofie ai se galuega.