Tetee atu se Tamā i le Faatulai Ese o lona Aiga mai Fanua o loo Nonofo ai

na matou toe taumafai ai loa i le faamasinoga i le 2015, ma aumai ai le faaiuga a Tiavasu'e Falefatu Maka Sapolu, e faatumauina le aloaia o faaiuga o le tausaga 56, 58, 66, 68 ma le 77, lea sa matou malo ai."

0
4301

Ua faasoa mai se tamā mai le afioaga o Tufulele i le tele o aafiaga ua oo iai lona aiga ina ua maua se poloaiga e faatulai ai latou mai fanua o loo nonofo ai nei.

O Leatupu’e Fata Malaki, o se matai mai Tufulele, sa tula’i ma lona uso o Leatuau Atonioi i luma o le Faamasinoga Faaitumalo i le vaiaso nei, e tali atu i moliaga o le contempt of court poo le lē amanaia lea o se faatonuga a le Faamasinoga.

Ua molia Leatupu’e ona ua latou le usitaia se poloaiga e tula’i ese ai. Ae o le mau a le matai, ua uma ona taoto faaiuga a le Faamasinoga e pei ona iai ni faaiuga o le 1956, 1958, 1966, 1968 ma le 1977.

“O faaiuga uma nei o loo faapea mai ai, e pule le suafa sa’o Luatuanuu i fanua, lea suli mai matou nei”.

“Peitai na faateia matou ina ua tuuina mai se poloaiga matou te tapena ese ma le fanua o loo matou nonofo ai nei, ona o lea ua iai le faaiuga o le 2007, e faaleaogaina ai faaiuga na matou malo ai.”

Saunoa Leatupu’e, ua oo i se tulaga le mautonu lona aiga, ona latou te le’i iloa se taimi na faatino ai se faamasinoga i le tausaga 2007.

“Na matou fesiligia lea faaiuga ona e le’i faia se faamasinoga.. na matou toe taumafai ai loa i le faamasinoga i le 2015, ma aumai ai le faaiuga a Tiavasu’e Falefatu Maka Sapolu, e faatumauina le aloaia o faaiuga o le tausaga 56, 58, 66, 68 ma le 77, lea sa matou malo ai.”

Tā’ua e Leatupu’e, na iai lona manatu ua uma lenei mataupu, peitai, e faateia o ia i le moliaga a le itu a leoleo, lea o loo molia ai o ia i le contempt of court – i lona le usitaia o se poloaiga e tulai ese ai le latou aiga.

Ina ua valaau lenei mataupu i luma o le afioga i le faamasino ia Papalii Alalatoa Rosella Papalii, sa toe tolopoina ma polo’ia ai e le tamaitai faamasino le itu a leoleo, ina ia toe faatulaga mai a latou moliaga, ona o loo feteenai moliaga ma faaiuga a le faamasinoga o loo i ona luma.

Ua tā’ua foi e Leatupu’e, ua ia tuuina atu se talosaga tusitusia i le Minisita o Faamasinoga le afioga ia Matamua Semanu Vasati faapea le afioga i le Palemia ia Fiame Naomi Mataafa, mo se faaiuga amiotonu mo lana mataupu.