O le faiva lava sa tua iai aiga ae maise o le suega seleni aua mea fai a le fanau, aiga, ekalesia ma afioaga.
Peitai, o le vaiaso lenei ao sauni atu tapenapenaga mo le Aso Sa o Tamaiti, ua leai se tupe maua e faamoemoe iai e pei ona molimauina e se tautai poo le faifava ia Fatu Totua mai Tafitoala.
Ua le mafai ona toe fagotaina gataifale o afioaga – ona o aafiaga ua tula’i mai ua aafia ai le siosiomaga, faapea ma se poloaiga a le Malo e faasa ai ona toe fagotaina le gataifale ao faia suesuega mo le saogalemu.
Saunoa Fatu, ua leiloa e i latou o fafaiva le mea e tua iai, ma o se faafitauli tele lea ua fetaia’i nei ma ia.
“Sa matou asia gatai ma nisi o le vaega lavea’i mai Apia, peitai, na matou toe foi mai ona o le malosi o galu..”
“Ae sa ou vaaia ai le suauu ua taape i luga o le sami..”
“Ae ina ua sua mai le tai, na vaaia ai foi i’a o upeupea i luga o le sami.. masalo o i’a ua mamate i le suauu..”
“O se faanoanoaga tele lea – auā e foliga mai, e i’u lava ina lē toe maua se avanoa mo matou nei le au faifaiva e toe fagogota ai.. ona o le faaletonu lea ua tula’i mai i i’a ma isi fo’i figota o le sami.”
Saunoa Fatu Totua, o le vaiaso tonu lava o tapenaga mo le Aso Sa a le fanau, lea ua tula’i mai ai lenei faafitauli matautia.
I le tulaga o se faasalalauga ua tuuina mai e puipuia ai le vaega o le sami sa tulai mai ai le faalavelave, sa saunoa Fatu, “O se faanoanoaga tele lava lena, ona o le sami sa matou faalagolago tele iai.”
O le afioaga o Tafitoala, e iai lo latou maketi o i’a e faia i taeao o Aso Sa taitasi, ma e toatele le mamalu o le atunuu e aga’i atu iai mo fefaatauaiga ae maise o i’a ma figota faatoa fagotaina i lena lava po.
“O le maketi o i’a a le matou nuu lea e fai i luma o le aualatele i taeao o Aso Sa, e tuufaatasi uma ai i’a a le au tautai ma vave ai ona maua seleni i vaiaso uma..”
“Peitai, e lei iai se maketi i le taeao o le Aso Sa na mavae atu nei, lea sa tupu mai ai le faalavelave..”
“O lona uiga o le tulaga lena o le a iai fo’i lenei vaiaso, o le a lē toe faia le maketi lea a le matou nuu, aua o le a leai se isi e toe fagota.”
O le tula’i mai o le faalavelave lea na mu ma goto ai le vaa a le Malo o Niu Sila le HMNZS Marananui i le po o le Aso Toanai amalama le Aso Sa 6 Oketopa 2024, ua aafia ai tele afioga lata ane.
Ua lipotia mai e le Taitai o le Navy a Niu Sila, e tele ituaiga suauu sa i luga o le vaa, e aofia ai ma le 950 tone (950 tonnes) o le suauu automotive gas oil sa i luga o lenei vaa ae le’i goto.
“There were different types of fuel on board the ship, the largest being 950 tonnes of automotive gas oil.”
Saunoa Fatu, “O se faafitauli tuga tele lava mo i matou, o le a aafia tupe maua mai le sami sa faalagolago tele iai le sailiga o tupe e tausi ai aiga ma fanau, aemaise o mea faalelotu ma mea faalenuu, ao lea e loma le Aso Sa pa’epa’e a le fanau..”
O Tafitoala o se tasi lea o afioaga o loo iai le latou faasao o le faisua o loo aputiputi mo se lumanai manuia o alo ma fanau a le afioaga, faapea le atiinaeina o le nuu i tupe maua.
Saunoa le faifaiva, “E ave e le savili le sami i gatai o le atu Safata, ae iai foi le galu e toe fo’i mai ai le sami – lea la e aafia ai le matafaga i taeao, faapea vaega mo mataaga poo tour i laumei, o le au faasee (surfers) ma le faasao o loo i autafa o le matafaga.”
Sa molimau fo’i se tina o loo fai lona atinae turisi i le afioaga, i aafiaga fo’i ua feagai ma latou talu le faalavelave. Saunoa Nerita Malae o le Sina BJ Beach Fales, sa agai atu ana turisi e faasee (reef surfing) ae omai ua vaaia le leaga uma o tino i le suauu.
Peitai sa tuuina mai se faasalalauga faalauaitele (joint press release) a le Malo o Samoa ma le Malo o Niu Sila i le taeao o le Aso Lua, e faapea mai ai, i le ta ai o le afa o le 10 i lena taeao (10:30am) e le o iai se aafiaga tau suauu i le mea sa tupi ai le faalavelave.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
