E telē se galuega e ao ona faatino mo le siitia i luga o le auaunaga a le Matagaluega o Soifua Maloloina, ma e tele foi ni vaega e ao ona faaleleia.
O le saunoaga lea a le Pule Sili o le Matagaluega, le afioga i le ali’i Polōfesa Aiono Dr. Alec Ekeroma ina ua mua’i feiloai atu le Ofisa Sili i le matagaluega.
Saunoa Aiono, “O le naunautaiga, e manaomia lo tatou galulue faatasi, tatou alo faatasi lo tatou vaa, e manuia ai le tatou folauga o lenei tausaga.”
O le taeao o le Aso Tofi sa faatino ai se sauniga lotu e talosia ai galuega a le Matagaluega mo lenei tausaga fou.
O le uluai taimi foi lea ua faafeiloai aloaia atu ai le Matagaluega i le Alii Polofesa, lea sa filifilia e le Kapeneta e na te taitaia le Matagaluega ina ua maea le suegatofiga sa tauva iai nisi o alii fomai iloga le tautua i totonu o le atunuu.
Na saunoa le afioga i le Minisita, Valasi Tafito Toomaga Selesele e faafeiloai le pule fou o le matagaluega.
“A oo ina tino mai se galuega ua lelei, e mafua ona ua fa’aoga tatau meaalofa na foai mai e Le Alii, agai le tagata ma lona valaauina..”
Na faamamafa i le saunoaga a le Minisita, e leai se galuega e agai i luma pe a nofonofo i le paolo.
“E leai se galuega molemole ma lelei pe afai e faafilemu le gagana.. Ae sologa lelei galuega pe afai e fa’aaoga tatau meaalofa.”
Sa fautuaina e le Minisita le galulue faatasi ma le felagolagomai o le aufaigaluega ma le pule sili ua tofiaina.
“O le fautuaga mo le tatou Matagaluega, ia ave le faatuatuaga ma le lagolago i le tatou taitai poo le Ofisa Sili ua tofia nei.
O lē ua tofia e na te taitaia le Matagaluega o Soifua Maloloina, o lo’o ia umia fa’ailoga tauāloa o le PHD in Building Health Research and Capacity of Clinicians mai le Iunivesite o Aukilani i Niu Sila, fa’atasi ma le MBA Health Management and Planning mai le Iunivesite a Keele i Peretania Tele.
Sa fa’au’uina fo’i mai le Iunivesite a Aukilani i le fa’ailoga tauāloa o le Tipiloma in Obs, Obstetrics ma le Gynecology.
E tele auaunaga tau soifua mālōlōina sa tautua ai lenei tamāli’i o Samoa amata mai i le tausaga e 1986 fa’apea ai lona tofiga talu ai sa tautua ai; o le Ofisa Sili o Pulega (Vice -Chancellor) mo le Iunivesite Aoao o Samoa (NUS).
E tolu tausaga le tofiga faakonakarate e taitaia ai e Aiono le Matagaluega
