“Nothing in that message implicated that she would ever take her life” – Tofilau fiti Leung Wai.
O upu ia ma loimata le matu o le tamaiata’i pule o le SSAB ia Tofilau Fiti Leung Wai, ina ua ia talatala, e aunoa ma se tau to manatu i le la mafutaga ma le uo e pele i lona loto le tamaita’i CEO o le UTOS ia Sa’u Justina Sa’u lea na avea lona soifua i le aso 21 o Oketopa o le tausaga ua mavae.
Na saõ le potu faamasino numera 2 i le itu o le faamasinoga maualuga i Mulinuu i lena taeao ina ua faafofoga le faamasinoga i mafatiaga o le uo, sa mamae, sa pele, sa fai tonu faatasi, ma sa’a faaoti le utu a le faimea i mafaufauga, o miti, o tonu o le lumanai aemaise galuega sa galulue ai.
Na toe fafagu i luga e Tofilau Fiti Leung Wai taga o le loto mafatia ina ua ia tolaulauina uiga o lana uo CEO, o le ua maliu ia Justina.
Na faailoa e Fiti o le galuega na lā masani ai ma Justina i le tausaga 1998 ao galulue ai i le ofisa o tupe a le malo. E iai mea e tutusa lelei ai lona tagata ma Justina.
Sa ia faamatalaina Justina o se tagata e le fiafia e fai ni tala o nisi, ae fiafia e fai mea e atinae ai o ia ma lona aiga. E tele ana fuafuaga mo le lumanai, e fiafia e talanoa i aitia o pisinisi.
“O lana aim i le lumanai, she wants to be a parliamentarian, she wants to run from Aiga i le Tai,” o le tala lea a Tofilau Fiti Leung Wai.
O lana masani e vili atu e taofi ni troplies mo le aoga a Apolima mo lana foai i faaiuga o tausaga.
Sa taua foi e Tofilau, e toafa i latou i le faigauo faatasi lea, sa fuafua e fia o i Fiti e tafafao ai ma ave latou fanau e faatafafo. O ia fuafuaga uma sa faagasolo lava e Justina ma o ia sa galue e vaai ni faletalimalo talafeagai e nonofo ai, ma le faamoemoe e faataunuu ia Iulai o le tausaga nei lea tafaoga.
“O le isi ana fuafuaga o le toe foi e fesoasoani i le pisinisi a lona aiga ma si ona tina.”
Na faailoa e Tofilau o Justina o se tagata faamanuiaina, e atamai, ma e tele foi ana fuafuaga faataatitia, ma e oo lava i ana miti e faailoa atu ia te ia ma o la talanoa ai.
“She is a person full of life”.
Na taua e Tofilau o le vaiaso ao lei maliu Justina, sa faamanatu ai lona aso fanau e atoa iai lona 43 tausaga. Sa o latou vaaia le fiafia o Justina i lena mafutaga.
Poo a lava ni faafitauli e lē vaaia se faanoanoa ae na te taumafai i se auala e foia ai.
O le isi tulaga na te iloa i le ua maliu o se tina e alofa i lana fanau, e tai pei o tina uma lava ma na te iloaina e le mafai ona faia e Justina se mea faapea i lana fanau.
O lana vaai e alu lava e faigaluega ma ave lana fanau, ma o se tagata e galue malosi tele.
“E alu atu lava ma sii atu Julani ma Sofia poo fea lava matou te o iai, so as a mother unless e leaga lou ulu o le a e tago ai fasioti oe.”
Na faailoa e le pule o le SSAB, sa la talanoa foi ma Justina e faatatau ia Kolani.
“O la’u vaai ia Justina ua alofa fo’i le tama lea.”
O le faamatalaga a Tofilau o ia na uo sili i le faaipoipoga a Justina ma Kolani.
Na maea ae vili atu ia te ia e le fia nofo Kolani i Ululoloa ona o loo tanu ai lona toalua muamua. Na ia faailoa o Justina o se tagata e le manao e talatala ni tala le lelei poo ni mea faapena faatatau i se isi tagata.
Sa tapena loa i SInamoga ma sa ia iloa na faatotoga uma e Justina le fale o Kolani ina ua nonofo ai i Sinamoga. O le SSAB sa faatau mai ai meaafale e pei o nofoa ma laulau, pusa aisa ma faakapoti uma le umukuka, ma isi meafale atoa ai ma le masini tamea.
Na ia manatua e le’i leva lava ona aumai le masini tamea ae vili atu ia te ia pe mafai ona omai tama e avatu le masini, ua ta’e le tapuni. O se taimi muamua lea ua avatu ai se masini ua ta’e faapea i le SSAB.
Na faailoa e Tofilau ina ua vaai i le masini sa ia fesili iai pe na faafefea ona ta’e lana masini ua matua leaga lava le tapuni, ae na tali mai, “Na ma misa foi tago tu’i le tapuni o le masini”. Na pau lava lena o lana tala.
O le manatu o Tofilau, e taumafai lava Justina e puipui Kolani. Sa iai ona masaloga ia Kolani pei e iai ni ona uiga faapea, e tago fasi Justina ma faleaga la meaafale, ae e lei talanoa atu lava Justina pe manao foi e faamatala ni tulaga o faia e Kolani ia te ia.
O le taimi mulimuli na taua e Tofilau na la talanoa ai ma Justina o le Aso To’ana’i ae vaveao o le Aso Sa lea na maliu ai.
Na fai le la tonu e feiloai i le ofisa i le Aso Toanai lea, peitai ona o lona pisi tele i lana fono na manatua ai ua ta le tasi i lea aoauli Justina. Sa ia lafoina atu loa iai le feau tusitusia (txt message) faapea ona ua pisi tele ae sei fai se taimi la te toe meet ai.
Sa tali atu poo le 7 i le afiafi ma faapea atu,
“Hi, malo lava faamalosi, aua e te popole, have a great evening, catch up next week.”
Na faaalia e Tofilau e lipi i lona mafaufau o le a alu vave Justina.
“Ana faapea ou te iloina o le aso mulimuli o Justina I would forget all my work and spend the whole last day with her.”
Na faailoa e Tofilau e faateia ia ina ua ala mai i le taeao o le Aso Sa 21 Oketopa 2018, e lua feau tusitusia i lana telefoni.
O le feau tusitusia i le 3:34am ma le faaupuga “Fiti Tina is gone” ma le isi feau tusitusia i le 7:10 am “Fiti Tina Pass away last night”.
Faailoa e Tofilau o feau nei e lei talitonu iai ma na manatu e pei o sana miti leaga.
O lea lava taimi na tago ai loa vili le telefoni ma lona manatu pe tali mai lana uo, ma faapea mai o se joke lea mea, ona e le’i talitonu lava i se mea faapea e tupu ia Justina.
E maea lava le molimau ma loimata o le tamaitai pule o le SSAB o lana tala lava lea, e le talitonu e oo se mea faapea ia Justina, ma o lea le mafuaaga o le a pule ai fua Justina i lona ola.
“She is a happy person.”
Na ia taua foi e atoa le fia vaiaso o mafatia e le matu ona loimata. Sa taumafai lona toalua e fesoasoani atu ina ia mafai ona ia faagalo le mea ua tupu i lana uo. E le mafai ona ia talia le mea ua tupu i lana uo e ese le matuitui tiga.
Sa fesiligia e le loia a le o loo molia ia Komisi Koria Tofilau, pe iai mea e le o faasoa atu ai Justina ia te ia, e pei o ana financial situations i le aiga, ae sa tali iai Tofilau e leai.
Sa toe fesili foi pe na te iloa e mā Justina e faasoa atu e uiga ia Kolani? Sa tali Tofilau, e faasoa atu na te iloa e iai faafitauli i le la va ae o Justina o se tagata positive e saili auala e foia ai faafitauli e le’o se tagata e vaai atu ua faavaivai ma ua siilima ini faafitauli.
(1)
