Teena se Poloaiga e Taofia ai le Faatinoga o le Galuega a Afega

0
918

O le  vaiaso talu ai sa teena lai se talosaga a le afioaga o  Levi Saleimoa, ina ua taofia le galuega o loo faagasolo nei e le afioaga o Afega.

Check these out at Le Well

O le poloaiga a Levi Saleimoa na tuuina atu, ina ia taofia le faatinoina o le galuega seia talia le faamasinoga apili.

Peitai e lei taliaina e le Faamasinoga o Fanua ma Suafa le talosaga a le afioaga o Levi Saleimoa.

O le aoauli o le Aso Faraile talu ai sa tuuina mai ai le faaiuga a le Faamasinoga o Fanua ma Suafa e tauala mai i le Peresetene le afioga iā Lesatele Rapi Vaai.

“O le talosaga a le afioaga a Levi ma Alamutu mo se poloaiga a le Faamasinoga e taofia ai galuega a le afioaga o Afega, ua teena.”

O le tapuaiga a Levi Saleimoa i fafo mai o le fale faamasino, Aso Faraile 1 Tesema 2023. Ata Pueina: Rodney Tafeaga, SGN.

O nisi o fanua o loo aafia i le galuega a le afioaga o Afega, o loo aumau ai nisi o le afioaga o Levi.

I fafo mai o le potu faamasino na saunoa ai le susuga i le igoa matua iā Maulolo Tavita Amosa, o le a toe fa’aauau le galuega a Afega i ona fanua o loo nofoia e Levi.

Ae o se finagalo a le tofa ia Umuleta’inafi Tuamasaga Pati Mua’au, i fafo mai o le potu faamasino sa ia saunoa ai e le’i faigofie ia latou le faaiuga a le Faamasinoga i lenei mataupu.

“O le faaiuga ua tuuina mai, e talia gata foi i matou lagona, ae faaetete foi e fai se faamatalaga ona e fa’aaloalogia faaiuga a le faamasinoga..”

“Ae popole foi ona o le matamata ita o aiga ona ua au tausaga o nofoia nei fanua. Ua mautu mea totino, ua tatanu foi tua’a, ua silia ma le 100 tausaga o nofoia, o matou faasinomaga..”

Ua faailoa e Umu, o le isi laasaga o loo faatali iai, o le talosaga ua faaulu mo le Faamasinoga Apili e toe iloilo ai le faaiuga e pei ona faataoto mai i le 1963.

Saunoa Umu, “E  47 aiga o loo aafia a latou fanua ma mea totino ma faatoaga i le galuega a Afega.

O le vaiaso nei e pei ona molimauina i Mulinuu i le Aso Gafua, sa vaaia ai foi le tumutumu o sui o lenei afioaga i le Faamasinoga o Fanua ma Suafa, mo le iloiloina o se talosaga a le afioaga o Afega e faatulai ese ai nisi o aiga mai fanua o loo aafia i lenei feeseeseaiga.