Faaliliuina Marieta H Ilalio
O le taeao o le Aso Gafua na toe tulai ai i luma o le Faamasinoga Maualuga se matai matua e latalata i le 70 ona tausaga le matua, lea o loo tuuaia ma molia e leoleo ina ua maliliu ni tamā talavou se toalua i Afega.
E fa moliaga faasaga i lea tama. E lua moliaga o le fasioti tagata faamoemoeina ma isi moliaga e lua e aofia ai le umia faasolitulafono o se laau malosi ma le faaaogaina o se aupega matautia.
O le tetee a lenei matai matua, na tauala atu i lana loia o loo totogi e le Malo (legal aid), o le tamaitai loia ia Leinafo Taimalelagi.
O loo teena e le itu a leoleo le talosaga a lē o loo molia e tatala o ia i tua e tālia ai taualumaga o lana mataupu (bail), ma o le vaiaso fou e iloilo ai lenei talosaga i luma o lana Afioga i le Faamasino ia Fepuleai Ameperosa Roma.
O Faalavaau Tai’i Vaotuua Neemia Pologa o loo tuuaia i lona tagatavaleina o ni alii se toalua – o Elisara Lole Fata ma Fata Utufua Fata i le po tonu o le vaeluaga o le tausaga fou, i Afega.
E tolu suafa matai o lenei tamā matua ma o ni suafa matai tāua uma e le gata i le aiga o lona faletua i Afega o loo suafa ai i le Vaotuua (Vao), ao ona afioaga i Siufaga ma Pata i Falelatai.
Sa faatumulia Afega i aiga uma o lē o loo molia mai Pata ma Siufaga Falelatai, i ni ifoga se lua sa faatinoina i aiga o alii ua fano o la soifua i lenei faalavelave.
E tusa ma molimau o lenei mataupu, na tā’ua ai o Elisara Lole Fata sa muamua ona fana i luma o lona fale, ao iai si ona toalua ma si ana fanau.
Mulimuli ane sa faaalia e molimau na savali atu lē o loo molia ia Fata Utufua Fata, o se tamā e toaono ona alo.
E pei ona tā’ua e tei o Fata Utufua (nephews) sa savali agai atu le latou uncle i le nofoaga na fana ai Elisara ma fesili poo lea le mea ua tupu. Peitai, na tā’ua e molimau, na savali mai lava lē o loo molia, ma fana faalua Fata Utufua.
Na o latou faailoa mai i le Samoa Global News e faapea na o latou vaaia Vao o savali atu ma tulei ese le isi matai na tutu faatasi ma Fata Utufua, ma tuu atu ai e Vao le fana i le fatafata o lo latou uncle, ae fana.
Na maea lea, ae toe ta’i le aupega i tua o le ulu ao punou lo latou uncle, ma toe fana faalua ai lē ua maliu.
O se tasi o nei tamaiti sa faia sana palauvale ona o lona lagona te’i i le faalavelave ua vaai iai, peitai, na liliu mai ai loa Vao ma le fana ma valaau mai “O ai na faia le tala lea?”
Na latou faaalia sa vave ona tamomoe ese i le fefefe.
“Na liliu mai lava Vao ma ka’i mai le faga ia makou.. makou agi loa, ma kokofu isi i le sami..”
E faaauau pea taualumaga o lenei mataupu i luma o Faamasinoga Maualuga o Samoa. O le vaiaso fou e iloilo ai pe faataga mai i tua lenei matai matua o loo molia, e tālia ai le aso o le Faamasinoga, ona o lea ua ia teena moliaga.
(0)
