Teena e se Alii Talavou Moliaga o le Taumafai e Faaoo le Oti i se Ave Taavale Laupasese

O loo molia o ia i le moliaga o le faaoo o manu'aga tuga, faapea ma le moliaga o le taumafai e faaoo le oti i se isi. [Grievous Bodily Harm and Attempted Murder].

0
1287

Aso Gafua 26 Fepuari 2024, Mulinuu Apia Samoa. O se alii talavou o loo molia i lona faaaogaina o se tamai naifi e tui ai le ua (sei tulou) o se ave taxi, sa tula’i i luma o le Faamasinoga Maualuga i le taeao o le Aso Gafua.

O loo molia o ia i le moliaga o le faaoo o manu’aga tuga, faapea ma le moliaga o le taumafai e faaoo le oti i se isi. [Grievous Bodily Harm and Attempted Murder].

Sa tetee e lea talavou e ala atu i lana loia moliaga uma o loo faasaga ia te ia.

E pei ona lipotia ia Ianuari, o se alii ave taxi e 49 tausaga sā aafia i lenei faalavelave matautia.

I suesuega a leoleo o loo tuuaia ai, sa malaga lenei alii talavou i le taavale laupasese, ae ina ua leai se tupe e totogiina ai le pasese, sa ia osofaia ai loa le ave taavale i se tamai naifi (pocket knife) ma tipi ai lona ua se’i tulou.

Sa tā’ua e le ave taxi o ia sa osofai mai tua, ae ua faateia o ia i le vaai atu ua lepa le palapala i ona ofu ma le taavale. Tu loa le taavale ae sola le tamaitiiti ma le ato tupe o ana pasese o lena aso.

O lenei faalavelave na tulai mai i Tuanaimato, ma sa maua le avanoa e sulufai ai le ave taavale laupasese i le nofoaga o le Pulega o Taaloga o le Olimipeka (le ofisa o le SASNOC).

Sa maua se fesoasoani mai ē sa i le ofisa o le SASNOC, ma latou tuli lea alii ma maua mai o loo savali i luga o le alatele.

O lenei alii talavou o loo tatala nei i tua i aiaiga masani a le Faamasinoga, e tālia ai se aso o le faamasinoga.

E tatau ona nofo mau o ia i Vaitele Fou, ma saini i le ofisa o leoleo i Faleata i Aso Lulu o vaiaso taitasi.

Ua tuuina mai fo’i e le Faamasinoga se tapu (curfew) e faasa ai ona toe fealuai o ia mai le 4 i le afiafi (4pm) seia taina le itula e 6 le taeao (6am).

Ua faatulaga le masina o Mati e toe fofogaina ai lenei mataupu. O le tamaitai loia iā Lucy Sio Ofoia o loo tulai mo lē tamaitiiti o loo molia nei.