Ua teena e Samau Leatigaga Timani Samau tuuaiga e faasaga ia te ia, o le fesootai atu lea i nisi o tagata palota latou te feiloai lona maota faapea lona sootaga i le tuuina atu o seleni.
Ae mo Lealailepule Rimoni Aiafi, ua ia teena foi tuuaiga, na te le’i tuuina atu ni tupe i nisi o tagata palota e pei ona finauina mai e le Itu a Samau.
O le vaiaso nei na tulai ai Samau ma Lealailepule e tali moliaga e faasaga ia i lā’ua.
O Talia Laloata ma Masaga Kennech, na molimau mo Lautimuia Uelese. O le molimau na tuuina mai ai i luma o le Faamasinoga e faapea:
O le Aso 20 o Fepuari na fai ai le la faatau i le faleoloa o Punaoalii Fetulima ae vili atu loa Samau ia Punaoalii, e tautuana le palota mo ia.
Sa ia faapea atu e talanoa ifo i soo se isi e lagolago atu, “ae a iai foi se isi e fia feiloai, faasino iai lou fale”.
O le mau na fofogaina i luma o le Faamasinoga, na tali atu Samau, “e omai i lo’u fale i Vaivase Uta, lea ou te iai i le taimi nei.”
Sa faapena ona fai. Sa feiloai atu ia Samau, ma talanoa mai foi Samau e avatu le lagolago mo le palota.
O le molimau, e le’i leva ae taunuu Lealailepule, ma savali atu ma talanoa.
“Na ou vaaia le gegogego o Samau ia Leala ma savali loa leala agai totonu o le fale o loo iai le faletua o Samau. Na toe savali mai Leala o loo u’u mai i lona lima tupe meamata.”
O le mau a molimau – na faapea atu Samau ia Leala, “o iai se mea i inā ma nai koeaiiga ia.”
“Tuu mai loa e Leala le $100 ia i ma’ua.” (Laloata & Masaga)
“Sa fai iai le mā faafetai ma faapea mai Leala, o lea laa ‘ou alu e momoli i se taxi stand e pu’e ai se la taavale.”
“Na ma savali sa’o i le taavale a Leala ae oso mai loa i fafo Fepuleai Atila Ropati e faatali i le fale o Samau.”
O le molimau foi lea a Masaga Kennech, o loo molimau mo Lautimuia.
E faapena foi le molimau a Lealailepule Rimoni. O loo ia ioeina i luma o le faamasinoga sa alu atu i le fale o Samau o loo talanoa mai Samau ma Laloata ma Masaga.
O loo ia ioeina foi sa alu i lana taavale e momoli ai Laloata ma Masaga i le taxi stand ae o loo ia teena na ia tuuina atu ni tai $100 tala ia Laloata ma Masaga.
Ae mo Samau o loo ia ioeina na latou talanoa ma Laloata ma Masaga i lona fale i Vaivase Uta, ae o loo ia teena na ia faapea atu ia Laloata ma Masaga e omai i lona fale. O loo ia teena foi na te le’i genogeno ia Leala agai i lona faletua ma aumai ai se tupe.
Ua alu le vaiaso o aso o suesueina mataupu tagi o le faigapalota laititi a le Itumalo o Vaimauga 3, lea o loo maitauina ai le faatumulia o lauao sinasina ma tupulaga i le Faamasinoga Maualuga o Samoa.
Ua maea ona faatulaga e le Faamasinoga folasaga mulimuli a loia o itu e lua (final submissions). O le susuga ia Alex Sua o loo tulai mo Samau ae o Lagaaia Fetu Lagaaia o loo tulai mo Lautimuia.
