Sauni Panoa e Tali atu i le Faamasinoga – Sa foai fanua o le NPF mo le Ekalesia Katoliko i Siusega

0
59

Ua teena e lê sa avea ma Pule Sili o le NPF lona faatoese i le Ekalesia Katoliko i Siusega ona o ni lafoga sa ia tuuina mai e faapea, sa foai ni fanua o le NPF e faatino ai se lulu a le ekalesia.

Ua saunoa Papalii Panoa, o ia ua sauni e molimau i luma o le Faamasinoga, ma tuuina mai faamaumauga e faamaonia ai, sa foai fanua o le NPF e fai ma faailoga poo prize a se lulu a le Ekalesia Katoliko i Siusega, i luga o se talosaga na tuuina atu e Tuilaepa, ao fai o ia ma Pule Sili.

I se feiloaiga a tusitala ma le afioga ia Papalii Panoa Tavita Moala, na saunoa ai Panoa, “ou te le faatoese, ae pau o lea ou te faamalulu atu ona o le tā’ua o le igoa o le Ekalesia.”

Saunoa Papalii Panoa, na mafua ona ou pa’i i le igoa o le Ekalesia, ona o lona tali atu ia Tuilaepa.

O le polokalame a le ala ata TV1 Samoa i le po o le Aso Sa 10 o Iulai, na saunoa ai Tuilaepa, “e lua vaiaso lea ua tuu atu ia Panoa Moala e faatoese mai ai. A uma le lua vaiaso e le faatoese mai Moala, o le a tusi atu loa matou loia. O le a oo loa le mataupu i luma o le Faamasinoga.”

Peitai i le tali mai a Papalii Panoa Moala i se feiloaiga ma tusitala i le vaiaso nei, na saunoa ai e faapea, “ou te teena le faimai ou te faatoese atu, leaga ana faapea e lē faamaonia mea ia ou te tautala atu iai, ou te faatoese..

“O le isi mea, ou te lē mafai ona ou tautala i ni mea e leai se faamaoniga. Ou te le faatoese..

“Ae na pau lava le itu na ou ta’ua ai le igoa o le Ekalesia o le faamalamalamaina o faiga piopio a Tuilaepa, ae o lea foi o le a alu Tuilaepa e faa’aoga mai le Ekalesia, ae afai e manatu tatou te o i le faamasinoga, ia ona ou alofa lea ia te outou, o loo iai faamaumauga maumaututu o mea ia ou te tautala atu ai..”

Na fesiligia le afioga ia Papalii Panoa pe aisea lava na le faamatala ai nei vaega uma i le taimi sa tutupu mai ai, poo le taimi foi sa faatoa ia tuua ai le nofoa sa galue ai o se Pule Sili o le SNPF, auā o lea ua silia ma le 10 tausaga talu ona malolo mai le galuega ao lea faatoa faamatala.

Peitai na saunoa Papalii Moala o ia na te lē manao e faaleaga se isi, o ia foi na manatu e lē oo iai sana tala i lea tulaga.

“Peitai ua le mafai ona ou onosai i le vaai atu o faaleaga mai a’u e Tuilaepa, o le ala lea ua ou le nofonofo ai loa, ae tatau ona fofola loa le fala sei faamasino mai lã Samoa..”

Sa fesiligia le taitai a le itu agai le susuga ia Tuilaepa Dr Sailele Malielegaoi i sona finagalo.

Na ia saunoa, e ai se taimi ona tali mai lea. Ae o lenei taimi, sei suiga malie mai lenei mataupu ona tuuina mai lea o se faamatalaga ae mo lenei taimi, ua i luma o le tulafono lenei mataupu.

Pei ona silafia o le afioga ia Papalii Panoa Moala Tavita na galue o se CEO a le SNPF mai le tausaga 1997 seia oo mai i le 2007.

E lei mafai ona faailoa mai e Papalii Panoa suafa o sui o le Board poo le Komiti Faatonu sa latou faia le faaiuga o loo ia saunoa iai.

Ae saunoa Papalii, afai ae oo le mataupu lenei i luma o le faamasinoga, o le a ia faailoa ai loa suafa o le laulau a fono na faia le faaiuga, e fai ma pine faamau o ana molimau mo le faamasinoga.