O loo teena e le Sui Faipule mo Sagaga 1, le afioga iā Loau Solamalemalo Keneti Sio, se faasalaga na fofogaina e le fofoga o le Maota ia Papalii Lio Oloipola Taeu Masipa’u e uiga i ni taimi sa le auai atu ai i fonotaga a le Palemene.
I le toe tauaofia ai o le Maota Faitulafono a Samoa i le vaiaso nei na saunoa ai le fofoga fetalai, “O le aso 30 Aukuso 2023 na ou tuuina atu ai se tusi i le faipule a le itumalo o Sagaga 1, i lona solia ai lea o tulafono faavae faapea le tulafono tau faigapalota faapea le faavae o Samoa.
“O lea e tuuina atu ai le avanoa i le sui usufono na te faailoa manino ai i totonu o le Maota pe na te talia pe na te teena foi.”
I le tali mai a le Sui Faipule, o lē foi sa avea ma kapeteni o le Manu Samoa, na saunoa ai Loau, e faalalolalo i le Palemene ma teena ai tuuaiga ua faasaga ia te ia.
“E tāua ia te au lou finagalo. Na oo atu lau tusi, peitai, o lea ua faaalia i le taeao nei lou finagalo, ma ou te faamalie atu pe afai e le faamalieina lou finagalo i se tali tusitusia sa tuuina atu e faailoa atu ai mafuaaga o lo’u le auai mai fonotaga o lena masina..”
“Ou te asu atu vai malu i lou finagalo. Ou te teena lau folasaga I le taeao nei, ou te manatu sa ou uia lava auala o tulafono tumau o le Maota, ae ina nei e manatu faapea ai e manatu māma le sui usufono i lau afioga.”
O le maea ai o le saunoaga a lē sa avea ma Minisita o Aoga ma Taaloga, na saunoa ai le Fofoga Fetalai ua manino ai foi lenei mataupu, ma e le o avanoa mo se felafolafoaiga a sui o le maota.
Ae o le taunuuga o le mataupu, o le a tuuina atu i le Komiti faapitoa o le Palemene (Parliamentary Privileges & Ethics Committee) mo se sailiiliga.
O le tolu ai nei o paeaega o le Palemene o avea Loau Keneti Sio ma sui faipule mo Sagaga 1. Sa mua’i tula’i mai i le tausaga 2006 ona le manuia lea i le palota o le 2011 ae toe fo’i mai i le 2016 e oo mai i le asō.
Ae lei maea le paeaega talu ai sa tula’i ai foi lē sa avea ma Palemia i lena taimi Mati 2023 ma tuuaia faipule e toafa i le lē usitaia o faavae o le fono ina ua toesea mai fonotaga a le Palemene.
Sa aafia ai le afioga ia Laaulialemalietoa, le afioga ia Fiame Naomi Mataafa faapea Olo Fiti Vaai ma Faumuina Leatinuu Wayne Fong, ina ua sa’i Tuilaepa ma faapea mai e le’i faagoi i latou ma mulimulitai i aiaiga o tulafono tumau.
Sa fesiligia e le Samoa Global News le Failautusi o le Palemene i lena taimi pe maua mai se lisi o ē sa le auai atu i fonotaga a le Palemene mo lena paeaega. Ae peitai e lei maua mai.
I le toe lagā ai o le mataupu faasaga ia Loau, ua toe tuuina atu ai se talosaga i le Palemene o Samoa mo se lisi o sui faipule uma o le Maota ma aso sa lē auai atu ai i fonotaga faalepalemene.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
