Sa tulai i luma o le Faamasinoga Faaitumalo le afioga i le tamaitai loia ia Taulapapa Brenda Heather-Latu e faaleo le teena ai e le afioga i le Palemia, faapea le Taitaifono ma le Failautusi o le FAST, o moliaga o gaioiga faaalatua (bribery) o loo faasaga ia i latou.
Sa tuuina atu e Taulapapa le tali tetee a le afioga ia Fiame Naomi Mata’afa, faapea Laaulialemalietoa Leuatea Polataivao Fosi Schmidt, ma Vaaaoao Alofipo, i moliaga o le faia lea o gaioiga faaalatua ma faiga faasolitulafono ao lumanai ai le faigapalota laititi a Vaimauga 3.
O nei tuuaiga sa tuuina atu ma faauluina i luma o le Faamasinoga (Private Prosecution) e se tamaitai e suafa ia Theresa Coffin.
O Theresa Coffin sa tulai talu ai nei i luma o le Faamasinoga Maualuga e fai ma molimau mo le sui tauva a le HRPP Samau Leatigaga Timani, ina ua suesueina mataupu tau faigapalota (election petitions) lea sa faaleaogaina (dismissed) i le vaiaso ua tuanai nei.
O le malaga faalauiloa (roadshow) ma se feiloaiga a le FAST na agai atu i le itumalo o Vaimauga 3 ao lumanai ai le faigapalota laititi, lea o loo faavae ai tuuaiga a Theresa Coffin.
Sa tuuina atu e le FAST se tino i tupe e $5000 tala mo sui o le itumalo na auai ai i lea aso.
O loo i luma foi o le Faamasinoga Faaitumalo moliaga o faiga faaalatua ua faaulu e le Failautusi o le FAST e faasaga i le Failautusi a le HRPP, le afioga ia Lealailepule Rimoni Aiafi.
O tuuaiga lava nei sa finauina foi i luma o le Faamasinoga Maualuga ina ua iloilo tagi o faigapalota (election petitions), lea na faaleaogaina uma e le afioga i le Faamasino ia Leiataualesa Daryl Clark.
Ae o le tagi a le tamaitai ia Theresa, o sona ia manatu, o se faiga faasolitulafono lea sa faatinoina, ma ua faatau ai palota.
Ua faatulaga e le alii Faamasino ia Loau Donald Kersalake le Aso 22 o le masina o Aokuso e amata valaau ai molimau o le mataupu a Theresa Coffin. Ae o Iulai ua tuuina mai e valaau ai le mataupu faasaga ia Lealailepule.
