Teena e le Pule Sili o le Matagaluega o Malae ma Faletaalo ni Moliaga se 5 e Faasaga ia te ia

0
1417

Na tulai le Pule Sili o Malae ma Faletaalo, le afioga ia Moefaauo Salale Monanu i luma o le Faamasinoga Faaitumalo, e faailoa lona teena o ni moliaga se lima e faasaga ia te ia.

O nei moliaga e aofia ai le faaoo lima, tau faamatau e faaoo le oti, umia o se a’upega matautia, umia o se laau malosi e le faatagaina, ma le tauaveina o se laau malosi.

O lenei mataupu na tulai mai i le masina o Iulai i le aoauli poo le ta o le tasi i se Aso Toanai. O se mataupu e maaleale, ona e aafia ai se tasi o Satini leoleo sa ofu savili i lea taimi.

O se tasi molimau sa faapea mai o nei moliaga na tula’i mai i se feeseeseaiga i le va o le Pule Sili ma se Satini Leoleo, ina ua tau fetoai a la taavaleafi i luga o le alatele. O le Pule Sili o le Matagaluega sa ia faafoeina le taavale a le Malo. O le Satini, sa ofu savili, ae sa malaga mai i lana ia lava taavale (private car) faatasi ma lona faletua.

Ina ua tutu uma loa taavale, sa tulai mai ai loa se feeseeseaiga o finagalo i le mafuaaga o le faalavelave lea sa manu e tulai mai. Sa faateteleina vevesiga, ma avatu ai loa e le Satini le Pule Sili o le Matagaluega, i le ofisa o leoleo ma faamautu ai loa moliaga uma nei e lima.

Ua faamauina e le Faamasinoga le tali tetee a Moefaauo, ma ua faatulagaina mai le aso 2 ma le aso 3 o Novema 2022, e suesue ai le mataupu, ma tulai ai molimau a le o loo molia e lagolagoina ai lona te’ena o moliaga.

Ua silia ma le 30 tausaga le tautua a le afioga Moefaauo Salale Monanu i le Malo.

O le tausaga e 2011 sa avea ai ma pulega o malae ma fale ta’alo, lea ua silia ma le 10 tausaga o faaauau pea. Ao lei avea o ia ma pule sili, sa ia umia le pule lua (ACEO) o le Faalapotopotoga o Eleele o Samoa (SLC). Sa ia galue foi o se sue tusi (Audit Office).