Teena e le Faamasinoga le Talosaga a se Tina e Tatala i Tua Lona Toalua o loo Molia i le Faaolima Mataga i se Teineitiiti 12 Tausaga

0
857
The Supreme Court - Mulinuu Courthouse.

E ui ina tutulu se tina o loo taofia e leoleo lona toalua i luma o le Faamasinoga Maualuga, ae na teena lava lana talosaga mo se avanoa e tatala ai i tua lona toalua.

E 58 tausaga o se alii na tulai i luma o le Faamasinoga Maualuga e tali moliaga e lima a le itu a leoleo ia te ia.

O nei moliaga e aofia ai le taumafai lea e faatino se fai’aga ma le tagotago.

Na poloaina e lana Afioga ia Fepuleai Ameperosa Roma, le faaauau pea ona nofo taofia le o loo molia, seia faamautu moliaga a le itu a leoleo, faapea le tuuina atu o se avanoa e saili ai se loia e tulai mo ia.

Na tulai le tina o le aiga ma faailoa i luma o le Faamasinoga, o latou o loo nonofo i Afiamalu i le uncle o Uilisona, ae o loo sauaina o ia, ae o ia e maua i ma’i o le tino.

Sa ia talosaga mo se avanoa e tatala ai i tua Uilisona, sei saili se mea e faamautu ai latou aiga.

Saunoa Fepuleai, “O le silasila o le Faamasinoga, e fai si ogaoga o moliaga ma e tatau ai ona nofo taofia Uilisona i lalo o vaavaaiga o malu o le malo, seia talia le aso e toe tulai ai i luma o le Faamasinoga.”

I faamaumauga o leoleo, e 12 tausaga o se teineitiiti sa aafia i lenei soligatulafono, ma o le tausaga lava lenei i le masina o Novema na lipotia ai e se tasi o tau aiga, le faafitauli i leoleo.

Ua faatulaga e le Faamasinoga le Aso 29 o Ianuari 2024, e toe fofogaina ai lenei mataupu.