Ua teena e le Faamasinoga Maualuga se talosaga DPO (Depareture Prohibition Order) sa tuuina atu e le itu a Lautimuia Uelese Vaai e taofia ai le tuua e Lealailepule Rimoni Aiafi o Samoa.
O Lealailepule o loo tuuaia i mataupu tau faigapalota i le va o le HRPP ma le FAST ina ua maea ai le palota laititi a le itumalo Vaimauga 3.
Sa tuuina mai e le tamaitai faamasino ia Talasa Atoa Saaga le faaiuga, ma faailoa ai ua teena lea talosaga, ma ua agavaa ai le tofa Lealailepule ona malaga ese atu pe tuua Samoa mo faalavelave poo mataupu foi faaleaiga.
Sa fetuunai foi e le Faamasinoga le aso o le a toe fofogaina ai lenei mataupu – e tusa ai ma le aso ua faailoa e le loia o loo tulai mo Lealailepule, e toe taliu mai ai lana faigamalaga.
O lenei mataupu na faailoa i luma o le faamasinoga i le vaiaso talu ai, i se talosaga a Fuimaono Sefo Ainuu mo le avanoa e tuuina mai ai le molimau a Lealailepule i luga o upega fesootaiga (zoom) ona o le taimi tonu lea o le a malaga ai Leala i atunuu mamao.
Peitai na teena e le itu a Lautimuia e tauala mai i lana loia ia Muriel Lui. Na taua e Ms Lui i luma o le faamasinoga, “e le tatau ona tuua e Lealailepule Samoa ao faagasolo taualumaga a le faamasinoga.”
O Lealailepule ma Fuimaono Atifale Te’o o loo tuuaia i le tuuina atu o seleni i nisi o le itumalo o Vaimauga 3 ae lei faia le faigapalota laititi a Vaimauga 3 lea sa manumalo ai Lautimuia Uelese Vaai.
O loo tuuaia foi e le HRPP Lautimuia i se vaega tupe e $5000 sa tuuina atu mo le Itumalo ao faia se feiloaiga a le FAST ma nisi o afioaga o Vaimauga 3, ao lumanai lenei lava palota.
O le aso 12 o Iulai o le tausaga nei o le a suesueina ai molimau a itu e lua i lenei mataupu o tagi tau palota, i le va o Samau Leatigogo Timani Samau faapea le afioga Lautimuia Uelese Vaai.
I le faigapalota laititi na manumalo ai le sui tauva a le FAST mai Magiagi, Lautimuia Uelese Vaai ina ua ia ausia palota e 1,531 mai le 2,737 le aofai o Vaimauga 3 sa palota. O le 56% lea o palota.
O le sui a le HRPP sa ia ausiaina le 1,082 o palota, poo le 39.5% pasene o palota.
