O loo tetee atu i latou e toatolu o le toafa o loo tuuaia i le maliu ai o se alii Saina fai pisinisi i o latou moliaga i luma o le faamasinoga.
O lenei toafa e aofia ai ma se auso e toalua o loo molia i moliaga o le talepe fale, fuafua e faaoo le oti, faomea faaaupegaina, fasioti tagata, faaoomanua tuga, ma le faaaupegaina i ni aupega malosi.
O Gogosina Leilua e na o le 18 tausaga lea o loo tulai ai le alii loia ia Leiataualesa Komisi Koria. E le’i tuuina atu sana tali i le faamasinoga ona e lei auai atu lana loia, ma o le Aso Gafua 13 o Ianuari 2020, lea ua toe tolo iai le mataupu i lea alii seia talanoa atu i lana loia ma tuuina atu ai loa sana tali i le faamasinoga.
O Tafi Samuelu 18 foi ona tausaga, o loo tulai ai le alii loia ia Tauiliili Harry Schuster. O Mikaele Leilua e 21 tausaga, o loo tulai ai le tamaitai loia ia Precious Chang.
O loo taofia pea e leoleo ia alii talavou, ma ua toe tolo atu la i le aso 15 o Ianuari o le tausaga fou e tuuina atu ai le talosaga pe tatala i latou i tua (bail hearing).
O Kome Sioeli 22 tausaga o loo tulai ai le alii loia ia Leuluaialii Tasi Malifa, o loo taofia pea i le falepuipui, ona o lenei alii o se pagota ma o loo tuli lona faasalaga i le taimi nei.
O le mataupu lenei o se faalavelave sa tulai mai i le Aso 12 o Oketopa i se pisinisi a se alii Saina i Vaitele.
O loo tuuaia nei alii talavou i le oo ai o latou e talepe le fale o Lin, ae tupu ai loa le faalavelave lea lea na maliu ai se alii Saina ae tigaina le isi alii Saina i manuaga.
O le 14 o Setema 2020 ua faatulaga mai e le faamasinoga o le a valaau ai molimau a leoleo i lea mataupu.
