Ta’utino tagata faigaluega e to’alua i le gaoia o le $30k

0
3743

07 Iuni 2020. Tusia e Marieta H. Ilalio

I taualumaga a le Fa’amasinoga Maualuga i le amataga o le vaiaso nei na tutula’i ai nisi se to’alua e faasaga i moliaga e 20 o le gaoi a’o avea ma tagata faigaluega i se kamupani gaosi oloa i Samoa nei. 

O i la’ua nei o Vavega Heather ma Frances Fa’afeu Valentino.

I le tolaulauina o lenei mata’upu i luma o lana afioga i le Fa’amasino Sili ia Satiu Simativa Perese na fesiligia ai e lana afioga ia i la’ua nei o lo’o tu’ua’ia, pe o finagalo e saili se la loia e tula’i mo le la mata’upu. Peitai, na o la fa’aalia, ua sauni e tali i o la moliaga e pei ona failaina e le itu a leoleo.

I le fofogaina o lenei mata’upu na fa’aalia ai e fa’apea o le va o le aso 3 aga’i i le aso 20 o le masina o Novema o le tausaga ua mavae na gaoia ai e i la’ua nei e to’alua se tinoitupe e o’o atu i le $30,000 lona faitau aofa’i pe a tu’ufa’atasia.

I le vaevaeina o soligatulafono nei e tusa e fa’a 20 ona gaoia e i la’ua nei (jointly charged) ia ta’i $1500 i le aso.

E le’i mafai ona fa’alaua’itele i tolaulauga a le Fa’amasinoga pe fa’apefea ona gaoia e i la’ua nei lenei vaegatupe, peita’i ua na’o le vaevaeina mai i aso ma le aofa’iga o le seleni sa la ave fa’agaoi i le aso e tasi.

Sa ioeina uma e i la’ua nei ia nei moliaga uma e 20 o lo’o faasaga fa’atasi ai i la’ua, ma fa’atonuina loa e le afioga i le Fa’amasino Sili ina ia toe tutula’i i luma o le Fa’amasinoga Maualuga i le aso 3 o le masina fou, aua se fa’ai’uga a le Fa’amasinoga mo i laua i se fa’asalaga, lea o le a fofogaina e le afioga i le Fa’amasino ia Vui Clarence Nelson