Faa-Samoa

Ta‘utino Lise-Marie sa Pepelo i Leoleo ma Taumafai e Fa‘asesē i le Faagasologa o le Fa‘amasinoga

September 2, 2026

1223

Ua ta‘utino ma ioeina e Lise Marie Schmidt moliaga e iva o le fa‘asesēina o Leoleo, e mafua mai i fa‘amatalaga pepelo na ia faia e uiga i lē sa fai ma Palemia o Samoa, le afioga i le Saofaapito ia Fiame Naomi Mata‘afa, ma le mataupu i le maliu o Dr Caroline Sinavaiana-Gabbard, lea sa fasiotia e Papalii Sia Figiel.

Na amata le fa‘amasinoga o Schmidt i le Aso Gafua i luma o le Fa‘amasino o le Fa‘amasinoga Fa‘aitumalo, Judge Papali‘i Alalatoa Rosella Papali‘i.

Sa fai tuuaiga a Lise-Marie Schmidt, ao avea Hon Fiame Naomi Mataafa ma Palemia o le Malo Tutoatasi a Samoa.

Peita‘i, i le aso lona lua, na talosaga ai lana loia, Maposua Tanya Toailoa, e suia lana tali atu i moliaga, ma ta‘utino ai loa lona taliaina o moliaga uma e iva o le fa‘asesēina o leoleo (misleading police).

O fa‘amatalaga ua ia ta‘utino nei sa pepelo ai, e aofia ai lana tu‘uaiga e fa‘apea na fa‘atonuina o ia e Fiame e ave ma nana le telefoni ma le tablet a Caroline Gabbard.

Na ia ta‘ua fo‘i sa ia vaaia i se telefoni ni ata ma se video e feso‘ota‘i ai le Palemia ma Dr Caroline ma Papalii Sia Figiel.

Na ia tu‘ua‘ia fo‘i Fiame i lona taumafai e nana uma nei mea mai Leoleo, ma sa ia fai mai sa la feiloa‘i ma talanoa ma Fiame i le Taumeasina Island Resort, ao faatali mai i fafo o le potu le security detail a lē sa Palemia.

Ae peitai, ua ta‘utino nei e le tamaitai o Lise-Marie, sa ia olegiaina ma tau atu faamatalaga pepelo i leoleo.

O lona uiga, e leai ma se mea o na tulaga uma e moni, ma ia taliaina ai, sa ia taumafai e taufaasese le faagasologa o suesuega ma le faamasinoga (attempt to pervert the course of justice).

O moliaga e iva o le fa‘asesēina o Leoleo na fa‘avae uma I luga o nei fa‘amatalaga na ia faia i le Aso 3 Mati 2025. I se tusi na momoli I le Komesina o Leoleo, ae kopi ai le Ao Mamalu o le Malo.

Sa tălia e le itu a leoleo le ioeina o moliaga ma le ta‘utinoga a Lise Marie Schmidt.

Sa malilie ai loa le itu o leoleo e ala atu i pe tamaitai Prosecutor ia Su’a Magele Leone, e tuu mai i tua moliaga e iva o le faia o molimau pepelo (fabricating evidence).

O le moliaga mulimuli sa mua‘i fa‘amauina, o le conspiracy to defeat the course of justice, na toe teuteu e le Itu a Leoleo lea moliaga e pei ona saunoa iai le tamaitai loia ia Su’a Magele Leone Su’a-Mailo.

“E fia teuteu i le attempt to pervert the course of justice — taumafai e fa‘alavelave pe fa‘asesē le fa‘agasologa o le fa‘amasinoga.”

Sa tula’i le tamaitai loia na tu mo Lise Marie ia Maposua Tanya Toailoa a ta‘utino ua ioeina fo‘i e Lise-Marie Schmidt lea moliaga.

O lona uiga ua ta‘utino e le tamaitai o Lise Marie Schmidt i moliaga e 10, ae ua fa‘aui i tua moliaga e 9 o le fabricating evidence.

Ua tolopo le mataupu mo le lauina o lona fa‘asalaga, ma ua fa‘atonuina fo‘i Lise Marie e le Fa‘amasinoga, ia aua ne‘i faia ni fa‘amatalaga e fa‘atatau i lē na a‘afia i ana tu‘uaiga i luga o upega tafailagi.

I lalo o le tulafono, o le fa‘asalaga maualuga mo le moliaga e tasi o le fa‘asesēina o leoleo (misleading police) e tolu masina i le falepuipui.

Ae o le moliaga o le taumafai e fa‘alavelave pe fa‘asesē le fa‘agasologa o le fa‘amasinoga, e oo atu lona fa‘asalaga maualuga i le tolu tausaga i le falepuipui.

Faasalalauga Tāua