O le Aso Sa nei e taunuu mai ai le au lakapi o le Moana Pasefika i laufanua o Samoa.
O se taimi muamua lea o le a taliu mai ai le au lakapi tuufaatasi a le Pasefika i Samoa, ma o loo tapena foi iai le Pulega o Tagata Tafafao Maimoa mai Fafo le STA mo le faataliga.
I se faatalanoaga ma le sui o le Matagaluega STA (Media Liaison) ia Taimalelagi Tutuila Farao, na saunoa ai, “O le taimi muamua lea ua malaga aloaia mai ai i Samoa nei le Moana ma o le a tapena atu foi iai mo lenei faamoemoe tāua.”
Na faailoa e le sui o le matagaluega le polokalame o le taunuu mai o le Moana.
* Aso Gafua; o le a faia ai le ava o le feiloaiga i le falesamoa a le STA.
* Aso Lulu; o le savali (parade) mai luma o le Ofisa Tineimu agai mai luma o le Maota o le Malo.
* Aso Tofi; o a taunuu ai le au lakapi a le Queensland Reds i Samoa nei.
O le a tapena atu foi le STA mo le faataliga o le Reds i le malae vaalele i Faleolo.
O lea au malaga o se avanoa tāua e faalauiloa atu ai Samoa e le gata o tama taaalo ae faapea foi o aiga ma supporters a le Reds o le a latou malaga faatasi mai.
O le Aso Faraile, 14 Aperila e faia ai le taaloga a le Reds ma le Moana Pasefika i le Apia Park.
Ua mafai loa ona faatau mai sau ticket ulufale mo le taaloga mai soo se lalā o le Digicel Samoa e pei ona faalauiloaina, mo le $10 tala (general admission).
(181)
