O le asō 2 Mē 2023 na taunuu aloaia mai ai le Sā a lana afioga i le Akiepikopō Alapati Lui Mataeliga i Laufanua o Samoa i le Malae Vaalele autū i Faleolo i le itula e tasi i le aoauli.
Na molimauina i luga o le ala ata o le Catholic Media Samoa-Upu Mana TV le toatele o le mamalu o le atunuu faapea tagatā lotu o le puleaga atoa o le Ekalesia Katoliko i Samoa, ae maise o uo ma aiga sa auai i le molimoliina o lona Sā – mai le malae vaalele i Faleolo e agai atu i Apia.
E tusa ai ma le faasilasilaga sa tuuina mai, o se sauniga faale-Ekalesia e faia i Faleolo, e taitaiina lea e le afioga i le Tamā Pule o le Matagaluega i Lefaga, afioga Patele Lafaele Tevaga. Ona molimoli ai lea o lona Sā i le malumalu a Sagato Mikaele i Leauvaa mo lona misasa amata faalepuleaga i le itula e 4 i le afiafi.
O le a taitaia le sauniga e le afioga i le Sui Epikopō i le Vikaliatu a Leauvaa, Afioga Patele Ponifasio Lugia, ma molimoli atu ai lona Sā pe a mae’a i le maota faasausau o Sefo Pa’u i Motootua.
O le afioga i le Akiepikopo Alapati Lui Mataeliga sa faamanavaina e Le Atua ana galuega i le maota gasegase i Aukilani i Niu Sila i le Aso 25 Aperila 2023 i le itula e 1:38 i le vaveao.
Na soifua mai le afioga i le Akiepikopo Mataeliga i Sataua Savaii i le Aso 4 o Ianuari 1953. Na tofia le afioga Mataeliga e avea ma Akiepikopo lona lua o Samoa-Apia i le aso 16 o Novema 2002.
- Today in History: 23 July 2021 Court of Appeal Ends Samoa’s Political Standoff and Declares FAST Party as the New Government - July 23, 2023
- Toe Foi Sui Faipule e Toatolu e Fai Faigapalota Laiti - July 19, 2023
- Saints Super 4 Netball Championship 2023 Launched with Sulu Fitzpatrick named Ambassador - July 17, 2023
