Ua faama’amulu ese mai le tamaitai loia ia Leota Tima Leavai i le tulai lea mo se alii ua ia olegiaina le Faamasinoga Maualuga i le faaogaina lea o suafa eseese.
O Harry Mapu, poo Junior Chong Nee, poo Junior Levai ma le isi foi igoa ua lauiloa ai, o Atonio Mapu.
O le aso ananafi sa tulai ai lea alii i le tolaulauga a leoleo, ua tolo faafia mai lana mataupu ona sa talosaga atu mo se loia e totogi e le Malo, lea na ala ai ona tulai le tamaitai loia mo ia, peitai na faailoa manino e le tamaitai loia, ua fiu e fesootai atu i lea alii e le talanoa mai.
Na talia e le alii faamasino ia Leiataualesa Daryl Clarke le talosaga a le tamaitai loia e faama’amulu ese mai le tulai ai mo lea alii, ona ua ia olegiaina le faamasinoga e ala lea i ona suafa o loo faaogaina.
Sa valaauina moliaga o lenei alii i le suafa Harry Mapu i le masina ua tea, i le attempted sexual connection with a child, faapea ai ma le armed with a dangerous weapon and threatening words ma ua tolopoina na mataupu mo le tausaga fou.
Peitai i le aso 11 o Novema, sa toe valaau ai foi lea alii i moliaga o le talepefale ma le gaoi, i le suafa Junior Levai.
Sa fesiligia loa e le alii faamasino ia Leiataualesa Daryl Clarke, pe le o ia foi lea o Harry Mapu, peitai sa faafiti mai lea alii e leai sona igoa faapea.
Sa toe tolo e le faamasinoga ae tuu atu le avanoa i le itu a leoleo mo se faamaoniaga.
Sa fesiligia le tamaitai leoleo na faia suesuega, ia Loretta Satele, mo sana faamatalaga.
O le faamatalaga faatauto a le tamaitai leoleo, sa tuuina atu i le faamasinoga e faapea, “O Harry Mapu, o Junior Levai lava lena, ma o Atonio Mapu, ma Junior Chong Nee isi foi igoa o loo faaogaina e lea alii”.
Saunoa Leiataualesa i le aso ananafi, “Ua e olegia le faamasinoga Harry, ma ua teena foi e le faamasinoga le tatala o oe i tua;
Ua talia foi e le faamasinoga le talosaga a le tamaitai loia e faama’amulu ai i lona tulai mo oe”
Ua toe tolopoina lenei mataupu ma tuuina atu le avanoa e alu ai Harry e saili sana loia, ma e totogi lava e ia.
(0)
