Tauaao le $50,000 mai le Mafutaga SCOPA i Niu Sila mo le 70 Tausaga talu ona Faavae le Laumua

0
174

E $50,000 le seleni sa tauaaoina e le mafutaga tama ma teine tuai o le Kolisi o Samoa (SCOPA) mai Niu Sila, auā le faamoemoe o le 70 tausaga talu ona faavae mai le laumua i Vaivase-tai.

O le afioga i le Peresitene a le asosi o alii ma tamaitai na a’otauina i le Kolisi o Samoa ae o loo alala ma pāpā aao i Niu Sila, sa fai ma sui o le mafutaga.

Sa saunoa Leaupepe Tala’i Junior Lene e momoli aloaia le latou meaalofa ina ua taunuu mai le savali tele a le Kolisi i luma o le fale o le Malo i le aso muamua o tapenaga.

Saunoa Leaupepe, “E toatele lava sui o le asosi sa iai le naunautaiga e fia auai, peitai, o tuatuano’a i galuega ma tulaga faaleaiga ua le mafai ai ona auai mai..”

Sa faafetaia e Leaupepe le afifio o sui mamalu o le Malo sa auai i le faamoemoe o le Kolisi o Samoa.

O le afioga i le Sui Palemia sa ia momolia le saunoaga autu.

Na molimauina foi le auai ai o le Ao Mamalu o le Malo, Tuiaana Tuimalelifano Sualauvi II, faapea le Sui o le Fono Sui Tofia le afioga iā Lemamea Tapusatele Tuiletufuga Ropati, o tamalii sa aotauina i le Kolisi o Samoa.

O nisi o tama ma teine tuai o le Kolisi o Samoa e aofia ai Minisita o le Kapeneta faapea nisi o tamalii ua avea nei mamFaipule o le Palemene, ae maise foi nisi o Faauluuluga o Matagaluega a le Malo.

Sa auai i le savali le Komesina o le Matagaluega a Leoleo le afioga iā Auapaau Logoitino Filipo faapea le Sui Komesina iā Afamasaga Leiataua Samuelu.

O le susuga i le faafeagaiga, Polofesa Mosese Mailo, o le faauluuluga o le kolisi faafaifeau i Piula, o se tasi o tama tuai o le laumua na taita’ia le sauniga lotu.

O le faletua ia Naitua Taefu, o se tina faavae poo le vasega amata i le tausaga 1953 na ia faamanuiaina le keke ma vaevaeina.

O le Kolisi o Samoa na faavaeina i le tausaga 1953, ao fa’aauauina le mau a Samoa mo se Malo Tutoatasi, e pei ona saunoa iai le Sui Ao ia Lemamea Ropati.