Aso Faraile 21 Oketopa 2022. Tau’aao le foai tupe le Malo mo le faiaoga le au siisii ma le Alii na ia mauaina le pine auro i le tauvaga a Malo o le Taupulega.
O le aoauli nei na faatino ai se sauniga puupuu e aloaia ai le tuuina atu o ni foai tupe a le Malo o Samoa i le faiaoga a le au siisii, Tuuaopepe Asiata Jerry Wallwork, faapea le alii sa ia ausia le pine auro mo Samoa, Don Opeloge.
I le saunoaga autu na saunoa iai le Minisita le afioga Leatinuu Wayne Soialo, e faafetaia le au siisii atoa faapea faiaoga sa gapatia le faatinoga o le faamoemoe mo fanau.
Sa faamalosiau e le Minisita le au taaalo sa auai ai, ina ia saga maua pea le lagona filiga ma le finau mo nisi faamoemoe faapenei i le lumanai.
Sa tuualalo foi le Minisita i le Asosi o le Olimipeka a Samoa – SASNOC, ina ia vave ona tuuina atu talosaga faapenei i le Malo mo taui o taaloga, ona vave lea ona saili se faalapotopotoga latou te faatupeina le foai.
Na saunoa Leatinuu, “O le faalapotopotoga o Petipetiga Samoa (Gambling Control Authority) lea ua ia faatupeina le foai seleni e $20,000 mo le ua ausia le pine auro, ae $10,000 mo le faiaoga, le afioga Tuuaopepe Asiata Jerry Wallwork.
O le Alii talavou ia Don Opeloge sa ia manumalo i le taaloga o le siisii uamea mamafa mo le 96kg.
I le maea ona tauaao mea’alofa tupe ona saunoa lea o le failautusi a le SASNOC le susuga o le tamaitao loia ia Sifuiva Maureen, e fai ma sui o le aso e faafetaia le Minisita ma le Malo mo le foai tupe ua tauaaoina mo le fanau.
Ae i se vaaiga i lenei aso, na auai atu nisi o faiaoga a le au siisii faapea nisi o tamaitai ma alii na pine siliva i le tauvaga a Malo o le Taupulega (Commonwealth).
Na saunoa le Minisita, “Mo i latou ua le maua ni faamanuiaga i lenei aso, aua le popole ua taoto le alafua mai le faigamalo talu ai e faamanuiaina ai nao latou e maua pine auro, ae o le a tagataga’i le faigamalo lea ua tulai mai, ina ia faasopolia uma faamanuiaga mo soo se pine.
I le maea ai ona tauaao atu le $10,000 mo le afioga Tuuaopepe Jerry, sa ia tā’ua ai, ua ia talia le faaaloalo a le Malo. Ae peitai, o lana $10,000 tala, o le a toe faafoi mai, e faasafua mo alii ma le tamaitai sa ausia pine siliva.
“Ua faafetai i le Malo mo le foai ma le faaaloalo maualuga. Ou te le tuua i lalo le faaaloalo, o lau pule lea. Ae o lau siaki o le a vaevae mo le toafa sa mauaina pine siliva.”
