Tau Sāili se Aiga o le Alii Talavou sa ia Aveese Faamalosi se Teineitiiti 7 Tausaga mai le Friendship Park

Ua maea ona saili i Vaimoso, Falelauniu ma Falevao se aiga o lea alii 17 tausaga ae le o maua lava..

0
2014

O loo taofia pea e leoleo se alii talavou 17 tausaga o loo molia i lona ave faamalosi ma faia ni amioga mataga i se teineitiiti 7 tausaga.

E silia ma le lua masina o taofia le alii o Martin Tuivaisipa, 17, ae se’i tau saili sona aiga e tatala atu ai i tua (bail) e tālia ai se aso e valaau ai lana mataupu i luma o le faamasinoga.

O Martin Tuivaisipa o loo molia i le aveese faamalosi o se teineitiiti 7 tausaga sa tafafao ma lona aiga i tua o le fale o le Malo i le nofoaga o le Friendship Park.

O le amataga o Aperila na tulai mai ai lenei faalavelave ma faasalalauina ai e leoleo le teineitiiti o loo sueina e lona aiga, sa leiloa mai lea nofoaga lautele.

E ao le po o le Aso Faraile ae faatoa momoli mai e se aiga mai Matautu-Uta lenei afafine i le ofisa o leoleo i le taeao o le Aso Toanai.

O le latou mau, sa latou maua atu i talane o le latou fale i Matautu-Uta le teineitiiti, ae ua leai se latou taavale toe latou te le’i silafia fo’i le mau faasalalauga i luga o Upega Tafa’ilagi.

I le valaauina o lenei mataupu i le vaiaso nei sa faailoa ai e le loia o loo tula’i mo Leoleo, ua fiu e saili aiga o le ua molia i Vaimoso e pei ona ia faailoaina o Vaimoso o loo iai lona aiga.

Sa faapena fo’i ona fiu leoleo e saili i Falelauniu lona aiga.

Sa saunoa foi le alii loia ia Leiataualesa Jerry Brunt o loo tula’i mo Martin, ua maea foi a latou taumafaiga e tau sāili ai lona aiga i Falevao, peitai, e le’i maua.

Na o faamatalaga na faailoa mai, o ona matua ua valavala ua fai lava le aiga o le tamā, faapena foi le tinā, ma e leai foi se isi o loo nofo mau i Falevao.

I le saunoaga a le Faamasino o le Faamasinoga Maualuga iā Fepuleai Ameperosa Roma, o le mataupu lenei ua mae’a ona faatulaga e le faamasinoga le Aso 13 Novema 2024 e suesueina ai mau.

“Peitai e le tatau ona taofia ai pea oe mo se taimi umi, ua manatu ai le Faamasinoga e ao ona vave tagofia lau mataupu..”

Ua faatulaga ai nei e le Faamasinoga le Aso 15 o Iulai 2024 e suesueina ai mau o lenei mataupu.