Tatau Ona Siitia le Numera o Tina i le Maota Fono o le Palemene

0
199

 

Ua faaleo e le sui tamaita’i o Gagaifomauga Numera 3 ia Faaulusau Rosa Duffy Stowers le manaoga e tatau ona siitia i le 15% tina e avea ma faipule o le maota fono o le palemene.

O lea fanoga sa tuuina atu i le tauaofiaga a le Palemene i lenei vaiaso i le taumafaiga e pasia le tulafono taufaaofi i le teuteuga o le Faavae o le Malo o Samoa i le tulafono o le Faamasinoga o Fanua ma Suafa.

“O le tatalo lena a lo’u sui i lenei taimi, aua o lea ua maua atu o le a siitia le fuainumera o le kapeneta, ia o loo iai foi le tulafono e siitia ai sui mamalu o le maota lenei;

“E le ono siitia ai fo’i la ma tina ma tamaita’i i le 15% mai le 10% – ia ona paleni lelei lea.”

E le gata i lea sa talosaga ai foi le faamautuina ai o se nofoa o tamaitai i le saofaiga a le kapeneta. O se manaoga na faauilavea ai le alii palemia e faamalamalama ma faasao.

“Lau Afioga i le fofoga fetalai, e ala ona faapasene le tulaga lea ona e iai mafua’aga, sa fesiligia a’u e le savali mai Malo Aufa’atasi (UN) pe o le a le mea ua le fa’apasene ai i le taimi a’o le’i faia le teuteuga lea;

“O la’u tali iai ailoga o tou manatunatu ma malamalama i le Faavae o Samoa, e leai se pasene o iai, o lona uiga o lea e faatafagaloa pasene, e mafai ona tatala ai le avanoa ia 100% ai tamaita’i e omai i totonu o le maota.”

“O lona uiga e mafai ona 100% tamaitai e omai i totonu o le maota, vaai la i le taua o le mea lena.”

Sa ia faapea mai foi afai ae sili atu tamaitai i le 10% ona faaleaogaina loa lea o le teuteuga lea na fai, o le uiga o lea mea ia oo i luga i el 100% tina.

“O le mea lea ou te fai atu ai o la outou e fai la tou talaiga ia tina uma le maota lenei, aua e leai se tapulaa o iai, na pau le tulaga lea e iai o le tapulaa maualalo ae leai se tapulaa maualuga, lona uiga fai la tou galuega.”

Sa toe tulai le sui faipule o Gagaifomauga Nu 3 ma ia faapea atu, afai la e uma le palota ua nao tamā lava e oo mai i le maota lenei, pe faapefea la, pe 100% a la tina e aumai i totonu.

Na tulai le Alii Palemia ma ia faapea mai “Le mea lea e fai atu ai i le sui, aua e te talanoa i le Faavae pe a le atoatoa lau tapenaga, na pau a le mea lea e iai o le tapulaa maualalo aua nei i lalo ifo o le toa 5, ae o luga lea e leai sona tapulaa. O lona uiga a uma ane le faiga palota o le maota lenei ua nao tina, ona o loa lea o matou e tautua mai outou. Afai la e pau ifo ua na o tama e le mafai ona toe oo iai le mea lena”

O le auga o le finagalo o Faaulusau ia siitia le minimum i luga i le 15%. O lona uiga ua le 5 ae toa 7.

Ae sa toe tulai lava le Alii Palemia ma ia faapea mai “O lea ou te malamalama i le minimum lea tou te mananao ai, ae ou te fai atu pe sii lava ile 50% ae a le faia le galuega a outou tina e fesoasoani iai e le mafai lava ona o’o i lena numera.”

O le suifaipule tamaita’i o Faaulusau o ia lea sa suia ai le Faavae o Samoa i le mafai ona faaatoa le 5 o tamaitai (10% o le Maota) e nofoia nofoa o le Palemene ona o le faatauaina o tina ma tamaita’i.


Maina Vai