Ua tuuina mai le faataatiaga o aoga a le fanau e tusa ai ma se saunoaga faapitoa a le afioga i le Sa’o Faapito ia Fiame Naomi Mataafa sa tuiina mai i le asō 22 Aukuso 2025.
Samoa e, e tumau pea ona ave le fa’amuamua a le Malo ile faamautinoaina o le soifua maloloina ma le saogalemu o le fanau.
E lē faigofie le tapunia o aoga, ae ua alagatatau i le silasila a le Malo mo le puipuia ma le faasaoina o tatou fanau ona o le a’afia tele o fanauiti i lalo o le 20 tausaga aemaise i latou i lalo o le 15 tausaga le matutua.
E fa‘afetaia ai pea le sao tāua o mātua ma faiaoga i le galulue faatasi ai ma le Matagaluega o A‘oga ma Aganu‘u, mo le faaauauina pea o aoaoga e ala i auala eseese, e aofia ai polokalame faaleaoaoga e fa’aaogaina ai upega tafailagi, ala ata ma ala leo.
Fa‘afetai tele mo vala uma o loo faao’o atu lesona o aoga i fanau, aemaise le onosaia o luitau i aoaoga a le fanau a o tatou galulue e faaitiitia le pepesi o le fiva o ponaivi i le atunuu.
E tusa ai ma fautuaga a le Matagaluega o le Soifua Maloloina, ou te faasilasila atu nisi o la’asaga fou ma suiga ile faatautaia o aoga a le fanau:
O aoga uma o le a toe tatala i le Aso Gafua, 1 o Setema 2025, pe a mae‘a faiga filifiliga a le atunuu i le vaiaso o lumanai nei.
O le a leai se malologa a aoga e pei ona masani ai mai le 26 o Setema i le 14 o Oketopa sei vagana ai le Aso Malolo o le Aso Sa Pa‘epa‘e o le Fanau, i le Aso Gafua, 13 o Oketopa.
O le a leai ni suega aoao mo Tausaga 4, 6, ma le 10.
Peitai, o le a faaauau pea suega aoao mo le Tausaga 8 o le a faatino mai le Aso 3 i le Aso 7 o Novema 2025.
E faaauau foi suega aoao mo le Tausaga 12, ma o le a faatino mai le Aso 24 o Novema i le Aso 5 o Tesema 2025.
O le a tuua i le Aso Faraile, Aso 5 o Tesema 2025 Aoga Tulagalua.
A’o le Aso Faraile, Aso 12 o Tesema 2025, e tuua ai Kolisi Maualuluga.
O le a faʻaauau foi galuega a le Matagaluega o Aoga ma Aganu‘u i taimi o malologa o Aso Fiafia, ina ia mautinoa le maua o iuga o suega faaiu a le Tausaga 12 mo le fa‘aulufaleina i le Iunivesite Aoao o Samoa i le 2026.
E faʻaauau pea ona mata‘itūina e le Malo tulaga uma i le pepesi o le faamai o le fiva o ponaivi ma fetuutuunai vaega talafeagai.
Ou te toe faaleoina le agaga faafetai i le paia o le atunuu mai lava i le Pule seia o’o atu i a tatou fanau mo le lagolagosua i galuega a itutino o le Malo ma Faalapotopotoga Tumaoti, e tali atu ai i le pepesi o lenei faamai. E faapea foi i a tatou paaga mai fafo i lo latou fesoasoani mai.
Ia malutia pea le atunuu pele i aao faaola o Iesu, a’o tatou i nei vaitau ma’ale’ale.
Ia manuia, Hon Fiame Naomi Mata’afa.
Aotelega o le Faamai: 14 – 22 Aukuso
Talu mai le Feiloaiga ma Tusitala ma Ofisa Faasalalau i le Aso 14 o Aokuso 2025, ua faailoa mai e le Matagaluega o le Soifua Maloloina le o’o atu ile 9,571 le aofaiga o i latou ua aafia ile fiva o ponaivi, e aofia ai gasegase fou e 1,601.
O lenei aofaiga e aofia ai le 218 o gasegase na taofia i falema‘i, ma e 50 o loo taofia pea, ma le toatasi o loo i le potu tigāina (ICU).
O le 91% o le fuainumera o i latou ua aafia o loo lipotia mai i Upolu, ma o loo faamauina pea le maualuga o le fuainumera o i latou o loo aafia mai i nofoaga i le talafatai o Apia ma Mātū i Sisifo o Upolu.
Public Notices
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
