O loo sailia nei e le Faamasino Sili le afioga ia Satiu Simativa Perese nisi o le mamalu o le vasega o loia e ono tulai mai e fia tauaveina le tofi Faamasino o le Faamasinoga Maualuga.
FAASILASILAGA TAUA
Sa faamaonia mai lea tulaga e le tamaitai Minisita, le afioga ia Matamua Seumanu Vasati Sili, le Minisita o le Matagaluega o Faamasinoga.
Saunoa Matamua, “O le tuua ai e le tamaitai faamasino ia Tafaoimalo Tologata Leilani Tuala-Warren o le Faamasinoga Maualuga, ua avanoa ai lea tofiga, ma e tatau ona iai se isi e sui tulaga i lea foi tamalii, aua le faagasologa o taualumaga o le faamasinoga.
Sa saunoa foi le afioga i le Minisita i le telē o le sao a le afioga ia Tafaoimalo ao avea o ia ma faamasino, ma o le a aafia tele galuega a le Faamasinoga pe a lē toe tulai mai sē tasi e lava le tomai ma le agavaa e sui tulaga ia te ia.
“E avea ai foi lenei avanoa e toe momoli ai foi le agaga o le faamalo ma le faafetai i le tamaitai poo le afioga ia Tafaoimalo mo lona sao ma lana tautua i le Faamasinoga.”
I le taimi nei e toaono faamasino o loo latou tauaveina mataupu o le Faamasinoga Maualuga, e aofia ai le Faamasino Sili ia Satiu Simativa Perese.
O le Faamasino Sinia o le Faamasinoga o Fanua ma Suafa, o loo umia lea e le afioga ia Vui Clearance Nelson.
Ma le toatolu loa o latou afioga i Faamasino ia Niava Mata Tuatagaloa, Leiataua Daryl Clark ma Fepuleai Ameperosa Roma.
O nisi o Faamasino o le Faamasinoga Maualuga o loo iai nei, sa siitia mai i latou mai le Faamasinoga Faaitumalo (District Court).
O le afioga ia Talasa Atoa-Saaga o loo ia umia le tofiga Faamasino Sinia o le Faamasinoga Faaitumalo.
O le afioga ia Alalatoa Rosella Viane Papalii, o se Faamasino o le Faamasinoga Faaitumalo, ma ona tauaveina foi le tofiga o le Pule o Maliu poo le Coroner.
O isi Faamasino o le Faamasinoga Faaitumalo e aofia ai le afioga ia Leota Raymond Schuster ma Loau Donald Kerslake.
- Public Notice: Job Opportunities with Samoa Ports Authority - October 25, 2023
- Important Notice - October 19, 2023
- Request for Quotation - October 19, 2023
