Tatala le Avanoa e Faaulu mai ai le Telefoni o le Vainuu i le Tuuga Fautasi o le Tutoatasi

0
66

Ua lima nei i le Telefoni o le Vainuu le aofai o fautasi o le tu’uga fautasi mo le Tutoatasi – e ui ina ua ma’ea le taimi faatapulaa o le resitala.

Sa faamaonia mai e le Taitaifono o le Komiti o Tu’uga Fautasi, le afioga Auapaau Logoitino Filipo, o se finagalo autasi o kapeteni o isi fautasi e 4, lea ua maua ai le avanoa mo le Telefoni o le Vainuu mai Manono Tai.

“O lea ua talia le Telefoni o le Vainuu mai Manono Tai, ma ua atoa iai nei le lima o fautasi..”

E pei ona lipotia talu ai, e na o le 4 lava fautasi sa resitaraina ina ua mae’a le taimi faatulagaina e resitara mai ai fautasi.

O le Don Bosco mai Alafua lea e kapeteni ai Vaimasenuu Zita Martel. O le Segavao, o le Little Rina mai Toamua ma le Tolotolo o le Tamauli mai Salelologa.

Saunoa Auapaau, sa tuu atu lava i Kapeteni o fautasi ia e 4 mo so latou finagalo – ina ua agai atu Sui o le afioaga o Manono Tai ma le latou talosaga.

“Sa lē au ese ai se finagalo o nei tamalii, ma autasi uma kapeteni e tatala le avanoa mo le Telefoni o le Vainuu.”

“O le tulaga o tapenaga ma le toe faaleleia o nisi o vaega o le fautasi lea na mafua ai ona le ausia le taimi sa faatulagaina o le resitala.”

O le afioga o Manono poo le Aiga i le Tai, ua loa foi tausa i le fa’agatama o le Tai, sa tauva mai ai foi le latou fautasi ua faaigoina o le Laau o le Saualii, Tavaesina, faapea le Telefoni o le Vainuu.

O le Aso Faraile, Aso 26 o le masina o Me o le a faataunuu ai le tu’uga fautasi e pei ona tapena atu iai le faamoemoe.