Tatala i Tua se Alii Talavou o loo Molia i le Fasioti Tagata Faamoemoeina e Tālia ai Taualumaga o le Faamasinoga

0
1360
The Supreme Court - Mulinuu Courthouse.

Ua tatala i tua se alii talavou o loo molia i le fasioti tagata faamoemoeina i se faalavelave na tula’i mai i Samalaeulu i le amataga o le tausaga nei.

O Fialelei Vaifale Sepetaio, na o le 21 tausaga mai Samalaeulu, o loo tuuaia i se faaoogalima na maliu ai Manuele Tionesio, 22 tausaga mai Tuasivi ma Fogapoa.

Ua talia e le faamasinoga se talosaga a le alii loia iā Su’a Alex Su’a o loo tula’i mo Sepetaio, mo se avanoa e tatala ai o ia i tua a’o tālia le faasologa o lenei mataupu.

O aiaiga masani o loo tatala ai i tua lē ua molia. O le taofia o ona pepa malaga, ma saini i le ofisa o leoleo i Aso Lulu ma Aso Faraile taitasi.

Ua faatonuina foi lē ua molia e nofo i lo latou aiga i Vaiusu ma aua nei toe oo i Tuasivi ma Fogapoa.

O lē ua maliu, o se tamā talavou e sau mai Tuasivi ma Fogapoa, ae sa mau paolo o ia i Samalaeulu.

Ua faatulaga e le faamasinoga le Aso 19 o Fepuari e toe tulai ai lea talavou, ma tuuina mai ai sana tali i le moliaga o le fasioti tagata faamoemoeina.