Tatala i Tua Edward Fanueli e Tālia ai le Faamasinoga i le Tausaga Fou

0
3987

Ua tatala nei i tua lē o loo tuuaia i le maliu ai o le tamaitai leoleo Police Officer Mele Segisolo Lapana i se faalavelave na tumai mai i le vaveao o le Aso Toanai 24 December 2022.

O le Aso 4 Mati 2024 lea ua atofaina e le Faamasinoga mo lenei mataupu.

Sa faauau pea le lokaina o Edward Brian Fanueli mai ia Tesema 2022 se ia oo mai i le faaiuga i le vaiaso nei, lea ua faamalieina ai le Faamasinoga e tatala i tua e tālia ai le aso o le iloiloga.

E le o se taimi muamua lenei ua tuuina mai ai se talosaga a Fanueli e tatala ia i tua (bail). Sa le talia i le uluai taimi na tuuina mai ai ona sa tetee le itu a leoleo i le taimi ao fou pea le mataupu.

E lei teena e le Ofisa o le Loia Sili le talosaga a Fanueli na tauala mai i lana loia Leiataualesa Koria, mo se avanoa e tatala ai, ao talia Mati 2024.

Saunoa le afioga Fepuleai Ameperosa Roma, “Ua talia e le faamasinoga le talosaga ona lea ua faamaonia mai le itu a leoleo, ua ma’ea ona faatino le ifoga i le aiga a lē ua maliu, ma ua talia foi le ifoga na faatinoina.”

O aiaiga; ia tuuina atu pepa malaga, ia nofo mau i Toomatagi i lona tuafafine, ia saini i le ofisa o leoleo Aso Lua ma Aso Tofi ao lei taina le 12.

Ia aua foi nei toe oo i Aleisa i le nofoaga sa tulai mai ai le faalavelave, ma aua nei ona taumafai e faafesootai molimau a le itu a leoleo.

Ua faatulaga e le Faamasinoga le Aso 4 Mati 2024 e suesueina ai mau a leoleo.

E lima moliaga a le itu a leoleo o loo teena uma e Edward Fanueli.

Na matauina le faatumulia o aiga le alii o Edward i totonu o le potu faamasino sa latou tapuaia taualumaga o le faamasinoga.

O loimata o le fiafia na feiloai ai i totonu o le potu faamasino ina ua talia le talosaga e tatala ai tua.