“E 70 fomai o loo galulue i le taimi nei i le falemai i Motootua, ma e lē taitai ona lava.”
O se saunoaga lea a le Ofisa Sili o le Matagaluega o Soifua Maloloina, le afioga ia Aiono Dr Alec Ekeroma.
Saunoa Aiono, o se fesoasoani mo lenei faafifatuli, pe a mafai ona galulue faatasi ma fomai tumaoti (private doctors) i Samoa nei. E ono tuuina atu foi se talosaga i Niu Sila ma Ausetalia mo ni fomai e fesoasoani mai.
Saunoa Aiono,o le tulaga utiuti ma le lē lava o le aufaigaluega lea ua mafua ai ona laa le Matāgaluega e tāpā se fesoasoani mai tatou fomai o loo galulue i falemai tumaoti.
“E 70 fomai o loo galulue i le taimi nei le falemai Motootua, ma e le taitai ona lava, o loo tele pea le manaoga..
“O le popolega ona o loo faamalumalu mai foi le misela, afai ae faatupula’ia le fuainumera o ē aafia, lona uiga ua tatau loa ona tuuina atu se talosaga i atunuu tuaoi mo se fesoasoani.”
Taua e le Ofisa Sili, o le talosaga i fomai tumaoti, e tolu aso o le vaiaso e faigaluega ai i totonu o le falemai.
I se faatusatusaga ma tatou tuaoi i Amerika Samoa, na tā’ua ai e Aiono e 60 fomai o loo galulue i le falemai autū o le LBJ.
“O le 40 o ia fomai e mai le atunuu o Fiti ma Filipino, ma o se tulaga lelei foi lea mo Amerika Samoa, ma e tatau foi ona faapena se tatou gaioiga pe afai ua utiuti le aufaigaluega e tali atu ai i manaoga o le atunuu.”
