Tatala Aloaia le Nofoaga Fou $7.8 Miliona mo le Ofisa Autu a le SNPF i Savaii

0
145

O le vaiaso nei na tatala aloaia ai le fale fou i Salelologa mo le Faalapotopotoga Faaputugatupe Lumanai Manuia o Samoa, le NPF.

O lenei galuega e silia ma le fitu miliona lona tau aofai –  $7,806,698.00.

I le tuuina mai o le tala autu o le galuega e le Palemia le afioga ia Fiame Naomi Mataafa, sa ia ta’ua ai, e lei faigofie le tau faatulagaina ma le tau faamautuina o se nofoaga e faatino ai le auaunaga.

O le aso 6 Iuni 1994 na mua’i tatala ai le ofisa o le NPF i Salelologa. Sa rent ai le NPF i le fale totogi o le susuga ia Mateo Sagato, ae o lena taimi, e nao le to’a 9 le aofai o le aufaigaluega na amataina le ofisa.

Mai lena toaiva o le aufaigaluega e aofia ai le susuga ia Fa’itulagi Mafi, o loo avea nei ma pule i Salafai, faapea le tamaitai o Taumaoe Tavuil. O i laua nei, o loo galulue lava i le ofisa o le NPF i Savaii, e oo mai i le taimi nei.

O le tausaga 2004 na toe siitia ai le ofisa o le NPF i le fale totogi o le afioga ia Masoe Mika, ae o le 2010 na toe see atu ai foi le ofisa i le fale totogi o Tomasi Mariner.

O le 2018 na manatu ai loa le Komiti Faafoe ma le Pulega ua tatau ona fausia se fale mautu ma sailia loa se avanoa e lisi mai ai se fanua mai le Faalapotopotoga o Eleele o le Malo (SLC).

O Fepuari 2020 na faamaonia ai e le Kapeneta o lena vaitau le fausia lea o se fale fou, ae o Me i le 2020 na faia ai se sauniga faapitoa e talosia ai le amataina o le galuega i le masina o Setema o le 2020.

O le kamupani fau fale a le Swatchz Construction na gafa ma le faatinoga o le galuega. O le e fale lenei e lua fogafale, o le fogafale muamua, o loo iai le ofisa NPF mo le faatinoina o le latou auaunaga. O loo iai foi ma se lala a le faletupe Bank South Pacific (BSP). O loo iai foi ma se ofisa o le Matagaluega a le Palemia ma le Kapeneta.

O le fogafale lona lua, o loo iai se potu fono (conference rooms) tele lava, ua ma’ea ona faatotogaina mo fonotaga.

Saunoaga Fiame, “O le tatalaina o lenei fale o se pine faamau lea o le faailogaina o le 50 tausaga o le Iupeli auro a le NPF, ae o se pine faamau foi o le faailogaina o le 60 tausaga o le Tutoatasi o Samoa”

Sa ave se faamalosiau a le Palemia i le aufaigaluega. “Ia tupu ma ola le faalapotopotoga aua se manuia o Samoa mo a taeao.. Ia lufilufi lima lelei, ma faasoa pule ma le tatau mo le atunuu ma ona tagata..”

O le masina lenei o loo tuuina atu ai e le Faalapotopotoga Faaputugatupe Lumanai Manuia o Samoa ni meaalofa tau seleni mo Sui Faisaofaga.