Tatala Aloaia le CD a le Autalavou EFKS Fasitoouta i Niu Sila
Sa tatala aloaia le CD pese a le EFKS mai Fasitoouta i le Te Puke Otara Community Center i Aukilani Niu Sila.
O le uluai CD lea mo le autalavou ma le EFKS i Fasitoouta i lalo o le taitaiga a le tama faaleagaga ia Uta Muaulu ma le faletua ia Feula Muaulu.
gUa faaigoaina lenei CD o le “Faamuamua le Atua i lou Talavou” ma sa fatuina ma tusia uma pese e 13 o loo i totonu o le CD e sui lava o le autalavou. O sui matutua foi o le autalavou le Susuga ia Aiono Tile Gafa ma le aoao ia Farani Pauga ma lona faletua ia Sinoi sa lagolago malosi i le tapenaga o lenei CD.
Sa faapea mai le Susuga i le faifeau, “Ua mafai ona faaogaina le taleni ma le tomai fatupese ma tusipese o tupulaga talavou o le Ekalesia”.
“O loo iai foi ma pese o le Kerisimasi.”
Sa pueina lenei CD e le Susuga ia Romeo Samoa lea o loo faauluulu iai le Dr Rome Production ma e toa luasefulu le au talavou mai Samoa nei sa malaga atu i Niu Sila mo lenei faamoemoe.
Ua leva ona taumafai mai lenei taumafaiga ma sa faamoemoe lava e tatala ma faalauiloa i Samoa, ae peitai ua a’e se tofa i le faafeagagiga ma le autalavou o le a tatala i Niu Sila le CD muamua lenei.
“Ua maua ai foi se avanoa e fai ai ae malologa a le autalavou mai galuega o lenei tausaga”.
O loo i Niu Sila lea autalavou, ma le faamoemoe e toe foi mai i Samoa i le maea ai o malologa i Aotearoa i le masina e tasi.
(0)
