Tatala Alava’a i le Vā o Tutuila ma Samoa

0
92

Ua toe tatalaina femalagaiga i le va o Samoa ma Tutuila sa faailoaina i le saunoaga a le Afioga i le tamaitai Palemia Fiame Naomi Mataafa i lana feiloaiga ma le vasega o tusitala i le aso Faraile na tea nei.

O lea sa ia taua ai le toe faatagaina o nei femalagaina i le va o Samoa ma Tutuila e aofia ai ma le toe faaauauina ai o malaga a i latou ua faamanuiaina i galuega faavaitaimi.

Saunoa le taitai i le mafuaaga na alai ona taofia femalagaina i Samoa ma Amerika Samoa, aua sa tulai mai ai se faaletonu i nisi o latou pasese na malaga mai Hawaii, ma o lea sa aumai ai se ripoti mai Amerika Samoa e faapea ua maea atu lena faafitauli ae sa leai se mafuaaga e atagia ai le pepesi o le faama’i.

Ua faamaonia foi le saogalemu o Tutuila o lea ua mafai ai loa ona toe faaauau faigamalagaiga i le va o Samoa e lua.

Ua maua foi avanoa e amatalia ai foi le malaga atu o gasegase i Samoa agai atu i Amerika Samoa, e pei ona faia ai se maliega i le va o malo e lua ina ia mafai ai ona avatu nisi o gasegase i Samoa aemaise mo le faaogaina o le faata aua o le taimi nei o loo faaletonu le itu o faata i le falemai i Motootua.

Saunoa le afioga i le Palemia, “E talitonu o se laasaga lelei lea, aemaise i lo tatou va tuaoi ma Amerika Samoa i se tasi lea o a tatou pa’aga, e taua foi a tatou fesootaiga ma galulue faatasi i auala aemaise lava o le fa’atupulaia o le tamaoaiga e auala mai i fefa’atauaiga ma nisi lava itu e masani ai le tatou atunuu, o le femalagaai i luga i faalavelave a tatou aiga.”

O le aso toanai na tea nei aso 30 Oketopa 2021 lea sa tatalaina ai loa le amatalia o nei faigamalaga i le va o Amerika Samoa ma Samoa nei, ma ua maea foi ona faatulagaina aso faapitoa mo nei faigamalaga ma e lua aso o le vaiaso e mafai ai ona faatino nei malaga o aso Tofi ma aso Toanai.