Ua pasia e le Kapeneta le faaauau ai pea ona tuua aoga a le Malo mo le tasi le vaiaso.
I le fonotaga a le kapeneta o le Aso Lulu nei 26 Aperila 2023, na soalaupule ai se talosaga mai le Matagaluega o Aoga, faapea le Matagaluega o le Soifua Maloloina.
Sa auai atu uma afioga i Ofisa Sili o matagaluega i le momoliina o le fautuaga ina ia fa’aauau pea ona tuua le fanau mo se vaiaso faaopopo se tasi.
O le Ofisa Sili o Aoga ia Aeau Christopher Hazelman, faapea le Ofisa Sili o le Soifua Maloloina ia Aiono Dr Alec Ekeroma, na folasia i luma o le Kapeneta le ripoti o loo faailoa ai, e silia ma le 100 le aofai o le fanau o loo faamauina o loo sulufai atu i falemai i le aso e tasi.
I se faamatalaga mai se tasi o Minisita na faamaoniaina ai o se tulaga lea na silasila toto’a iai le Kapeneta ma taunuu ai loa lana faaiuga e fa’aauau ai pea ona tuua le fanau aoga.
“Ua faaogaina lenei vaiaso faaopopo e unaia ai matua ina ia mataitu lelei auala o puipuiga mo le fanau ae o se avanoa foi e faatino ai tui puipui mo le fanau pe afai e lei ma’ea tui ona fai.”
Sa mataitu foi le tulaga o le saogalemu o le fanau ao faapena ona toe alia’e mai le misela i le tatou motu tuaoi i Amerika Samoa, lea ua faamauina le silia ma le 31 le fanau ua pesia i le misela ma tapunia ai foi a latou aoga.
O loo vaavaai toto’a le kapeneta i le tulaga e mafai ai ona taofia le ofi mai o le misela ma isi ma’i pei o le mami, ma isi faama’i e pei ona aafia ai Samoa i taimi ua tuanai.
O loo faatumulia pea le falemai i itumalo faapea ma le falemai i Motootua i le toatele o matua o loo auina atu fanau mo togafitiga o le fulu, ma auga o le fetalei sei tulou, faapea ma le fiva.
