Tusia: Pesetā Tusiga Taofiga, Sooupu a le Malo. E ui i le tāua o a’oa’oga mo fanau lalovaoa o Samoa, ae ua sili atu ona fa’atāua e le Mālō le soifua mālōlōina o fanau ina ne’i to’atele ni soifua ma’imau ona o le pepesi ai o le fa’ama’i o le Fiva Ponāivi i lenei vaitau.
Ua se’e le Mālō e tauala atu i le Matāgaluega o Ā’oga ma Aganu’u, e galulue fa’atasi ma faiā’oga ma mātua ina ia fa’aauau a’oa’oga mo fanau e fa’aāoga ai feso’otā’iga televavave fa’aneionapo e ala i le zoom ma vasega i luga o televise fa’apea fo’i ma le aga’i ane o mātua e piki meaā’oga a fanau e fai i totonu o ‘āiga mo toe momoli ane i le faiā’oga.
Peita’i o le ā fa’aauau pea ona lē a’e ā’oga ona o le popolega i le si’itia o le pepesi o le Fiva Ponāivi, aemaise ai o lo’o ‘ave le fa’amamafa a le Mālō i le mua’i fa’amamāina o faleā’oga ma fagaina i vailā’au fa’apitoa e tapē ai namu, a’o le’i toe a’e ā’oga i fanau.
Auā e sili lava le puipuia, i lo le tau togafitia.
Saunoa le Palemia iā Fiame Naomi Mataafa i le asō;
“O le ā fa’aauau pea ona tapunia ā’oga mo le puipuiga o le fanau se’ia saogālēmū ma fa’aitiitia le fuainumera o i latou ua a’afia.
“Ua fa’atino fo’i ni auala e fetu’una’i ai taimi faigaluega a tagata faigalueaga a le Mālō ina ia fesoasoani i le tausiga o fanau ma ‘āiga ua a’afia i le fiva ponāivi.
“E fia fa’aleoina fo’i le agaga fa’afetai a le Mālō i pisinisi o lo’o fa’atino galuega fesoasoani mo ā latou tagata faigaluega ua a’afia o latou ‘āiga i le fa’ama’i.”
Saunoa le Ofisa Sili o Pulega o le Matāgaluega o Ā’oga ma Aganu’u iā A’e’au Chris Hazelman, e telē lava le galuega a le Matāgaluega ma faiā’oga fa’apea Asiasi Ā’oga o lo’o faia i le taimi nei, i le naunauta’iga ina ia mafai ona fa’aauau pea lesona fuafuaina mo lenei kuata e ui ua motusia a’oa’oga ona o le Fiva Ponāivi.
Fa’ailoa e A’e’au, e i ai lu’itau ua maitauina i a’oa’oga e fa’aāoga ai feso’otā’iga televavave fa’aneionapo, peita’i e lē ‘alofia ia tulaga, a’o le va’ai mamao, o le ā fautuaina ai Asiasi Ā’oga, Puleā’oga ma Faiā’oga mo le tapena lelei o lipoti a ā’oga ta’itasi, e fa’ailoa atu ai i le Matāgaluega tulaga ua o’o i ai lesona na a’oa’oina e fanau i vasega ta’itasi.
O lenā faiga, o le ā fetu’una’i ai galuega a le Matāgaluega mo le tapenaina o pepa su’ega aemaise vasega fa’ai’u i Kolisi fa’apea Ā’oga Tulagalua i le atunu’u.
O le toe a’e o ā’oga e fuafua lava i le fa’aitiitia o le pepesi o le fa’ama’i o le Fiva Ponāivi.
Special Notice
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
