Tapu ona Faasalalau le Igoa o le Pule Aoga ao Faagasolo Taualumaga o le Faamasinoga

Ua tuuina mai se tapu a le faamasinoga e faasa ai ona faasalalau le igoa o le pule aoga ao faagasolo le mataupu..

0
1926

Ua talia e le Faamasinoga se talosaga e puipui ai le igoa o le pule aoga (name suppression) o loo molia ma tuuaia i lona faia o ni amioga le talafeagai i se faiaoga.

O le vaiaso nei sa tulai ai i luma o le faamasinoga mo le taimi muamua le pule aoga ma ia tetee malosi atu i moliaga e fā o loo faasaga ia te ia.

O le faaiuga o Ianuari sa molia ai e leoleo le pule aoga, ina ua tuuina atu se tagi a se tasi o tamaitai faiaoga.

E pei ona tuuina mai e le Sui Komesina o Leoleo ia Papalii Monalisa Tiai-Keti, o se fiafia faaiu a lenei kolisi ae lei tuua le aoga ia Tesema sa tulai mai ai le faalavelave o loo tuuaia ai le pule aoga.

Sa tula’i le loia o loo tū mo le pule aoga ma ia talosagaina se tapu a le Faamasino e faasa ai ona faasalalauina le igoa ma se isi lava faamatalaga e mafai ai ona faailoa o ia.

Sa talosagaina foi le tatala i tua o le pule aoga e tālia ai taualumaga o le Faamasinoga ao faagasolo.

O le Aso Tofi ma tuuina mai ai le tali a le Faamasinoga e tapu ai ona faasalalau le igoa o le pule aoga faapea ma le igoa o le aoga o loo aafia, ona e mafai ai ona faailoa le pule aoga.

Afai e le faamaoniaina tuuaiga, e faaauau pea lea tapu, peitai, e aveeseina le tapu pe afai e faamaoniaina moliaga faasaga i lea pule aoga.

O loo tatala i tua le pule aoga i aiaiga masani e pei o le tuuina atu o ona pepa malaga; ma le saini i le ofisa o leoleo i vaiaso taitasi

O lenei mataupu o loo faia i luma o le Faamasinoga Faaitumalo, ona o le moliaga o le faaoolima o loo molia ai le pule aoga (assault).

Peitai o soligatulafono tau feusuaiga (sexual assault) o luma lava o le Faamasinoga Maualuga e faatautaia ai.

E lei maua mai se tali i le Ofisa o le Loia Sili poo Prosecutors poo lea le sa’o o moliaga ua i luma nei o le Faamasinoga Faaitumalo.