Tapena le Malo e Vave Aumai Fanau Na Fano Soifua i Ausetalia

0
1452
Minisita o Tupe - Afioga Lautimuia Uelese Afoa Vaai

Ua faailoa taumafaiga a le Malo o Samoa mo le vave aumaia o tino maliliu o fanau na fano soifua i se faalavelave tau taavale i Ausetalia.

I se feiloaiga a le vasega o tustitala ma lana Afioga i le Minisita o Tupe, Lautimuia Uelese Afoa Vaai, na saunoa ai le Minisita, “Ua galulue faatasi le Matagaluega o Tupe (MOF), le Matagaluega o Va i Fafo (MFAT) ma le Ofisa Komesina Maualuga o Samoa i Ausetalia i le tapenaga o vaega uma o le aumaia o tino maliliu o alo o le atunuu na aafia i se faalavelave tau taavale na maliliu ai i Ausetalia.”

Saunoa Lautimuia, “O le faamuamua lea o le Malo o ana taumafaiga ia vave ona aumai tino maliliu ae lei aulia le tausaga fou.”

Na taua foi e le Minisita, “E tele vaega e ao ona faamalieina Ausetalia, e pei o suesuega ma ta’otoga faapitoa, atoa ai ma le faamalieina o le Coroner, a o lei faamautu mai tino maliliu. O le isi foi itu, o le va o tatou i Samoa ma le kamupani sa faafaigaluegaina ai tatou fanau.”

“O le taumafaiga na o loo ua galulue nei iai le Vaega o Tupe, Va i Fafo, faapea le tatou Ofisa Konesula i Ausetalia. O le naunautaiga lava ia le silia le tausaga fou, ona o loo faatali aiga, o matua, uso, tuafafine, o taitoalua ma fanau.”

O se tala faanoanoa i tapuaiga a aiga ona o le faalavelave na fano ai soifua ao faimalaga i latou toafa e toe foi le nofoaga e faamautu ai, ina ua maea se tafaoga na latou asia ai nisi foi o nofoaga o loo faamautu ai foi nisi tama fanau a Samoa sa malaga atu mo galuega faavaitaimi i totonu o Ausetalia.

O i latou ua maliliu nei e aofia ai Aperaamo Tapelu, 24 tausaga mai le afioaga o Letogo; David Gasologa, 27 tausaga mai Falefa; Derrick Amotua, 28 tausaga mai Lufilufi ma Falevao; ma Alesana Anitelea, 34 tausaga mai Safotu ma Lefagaoalii ua tuua lana faletua ma lana alo e toatasi.

O i latou nei na tuua Samoa mo Ausetalia I le masina o Iulai o le tausaga nei mo le 9 masina o le konekarate le umi.

Ua faamauina foi le matagaluega o loo gafa ma le vaaia o galuega faavaitaimi, talu mai le tausaga 2007 na amatalia ai le polokalame o galuega faavaitaimii  totonu Niu Sila, e toafa(4) i latou ua fano ai soifua. Ae mo Ausetalia, e 12 i latou ua maliliu talu mai le 2012.

O loo faamauina foi, o i latou uma nei e toa sefulu ma le ono ua maliliu, o le ma’ea o taimi faigaluega na tulai mai ai faalavelave ma fano ai soifua.