Tusia: Perolini Numia, Sooupu a le Malo. O le asō sa feiloa’i ai le afioga i le Minisitā Lagolago o le Matāgaluega o Ta’aloga ma Alagā’oa mo le Soifua Fiafia o Tagata iā Fiu Fa’aolatane Ponifasio Vasa ma le Ta’ita’ifono o le Komiti Fa’afoe o le Asosi o le Lakapi Tag Fa’avāomālō i le lalolagi iā Chris Cowan.
O le ‘auga ma le fa’amoemoe o lenei feiloā’iga e fa’ailoa ai le malaga mai a le Ta’ita’ifono ma fa’amautū ai le saofagā o le ‘au fa’avāomālō a Samoa i le Ta’amilosaga Fa’avāomālō o le Lakapi Tag i le tausaga fou 2026.
Sa tatala manino e le afioga i le Minisita Lagolago le tāua tele o lenei avanoa ua maua e le ‘Au Lakapi Tag a Samoa.
“O se taimi muamua lenei ua maua ai se avanoa o le tatou ‘au Samoa Tag mo ta’aloga fa’avāomālō lea o le ā fa’ataunu’uina i le tausaga fou.
“O lenei feiloā’iga e le gata o le fa’ailoa o latou tapenaga mo le ta’aloga, ae o le naunauta’iga fo’i o le Fa’alapotopotoga Tag a Samoa, ina ia atia’e le ta’aloga i totonu o si o tatou atunu’u, e fesoasoani lea i alo ma fanau a Samoa mo le lumana’i.
“O le fesoasoani a le Matāgaluega nei, po’o le ā lava le ta’aloga ua lesitala ma fa’ataunu’uina i totonu o le atunu’u, o le ā fesoasoani malosi i ai le Matāgaluega, auā o se tasi fo’i lea o vaega ua ‘ave i ai le fa’amuamua a le Mālō, o le atina’eina atili o ta’aloga.”
Ae i le feiloā’iga a le Savali ma le Peresetene o le Asosi Lakapi Tag a Samoa iā Fa’aofonu’u Junior Leota, sa ia saunoa ai i le tāua tele o lenei fa’atasiga.
“O le tāua tele o lenei feiloā’iga i le asō, ina ia silafia ai e le Mālō tulaga ma tapenaga, ina ia i ai le lagolago a le Mālō, a’o tapena le tatou ‘Au Lakapi Tag i le Ta’amilosaga o le Ipu o le Lagolagi i lea Fa’agatama i Ausetalia iā Oketopa 2026.
“O lo’o fa’agasolo lava tapenaga a le tatou ‘au auā le ta’amilosaga lenei, ma o lo’o i ai le fa’amoemoe e mae’a le Kerisimasi, ona tu’u fa’atasia lea o tamafanau o lo’o i Niu Sila ma Ausetalia fa’atasi ai ma tamafanau i Samoa nei.
“O le isi vaega o le malaga mai ai o le Ta’ita’ifono, o le silasila lea i le tulaga o malae lakapi i totonu o le atunu’u, ina ne’i fuafua se isi ta’amilosaga lakapi tag e ono aumaia i Samoa tatou te talimālō ai, a’o lea o lo’o lava tapena Samoa i lea tulaga.”
Saunoa manino le Peresitene o le Asosi Lakapi Tag a Samoa, e 200 tamafanau o lo’o i totonu o le polokalame auā le fa’amoemoe lea mo Ausetalia. O se aso o i luma o le ā fili ai ni ‘ave fu’a a Samoa mo le sailigā o le Ipu o le Lalolagi i le Lakapi Tag 2026.
Public Notices
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
