Ua fa’amaonia mai e le afioga i le Palemia o Samoa iā La’aulialemalietoa Leuatea Polāta’ivao Fosi Schmidt, le talia aloā’ia e Samoa o le valā’aulia fa’apitoa mai le Mālō o Amerika Samoa auā le fa’aulufalega o lo latou Maota Fono i le Aso 28 Novema 2025.
Na afio fa’apitoa mai le afioga i le Fofoga Fetalai a Amerika Samoa iā Savali Talavou Ale, e valā’aulia fa’apitoa Lana Afioga i le Ao Mamalu o le Mālō Tuto’atasi o Samoa iā Tuimaleali’ifano Va’aletoa Suālauvī II ma Lana Masiofo, le afioga i le Palemia fa’apea le Fofoga Fetalai iā ‘Au’apa’au Mulipola ‘Aloitafua ina ia afifio atu e molimauina le tatala aloā’ia o le Maota o le Fono Usu a Tutuila ma Manu’a.
Saunoa le Ta’ita’i o le Mālō, ua tapena le aumalaga a Samoa mo lea fa’amoemoe tāua, ma e afifio uma le Ao Mamalu o le Mālō, o ia o le Palemia fa’apea le Fofoga Fetalai, fa’atasi ai ma nisi o le aufaigaluega a le Mālō e lagolagosua i lo latou malaga ai i lenei fa’amoemoe tāua.
Ta’utino La’aulialemalietoa, e seāseā tupu sea fa’amoemoe, ma e tāua ai le auai o Ta’ita’i o Samoa e molimauina lenei galuega tāua a nai o tatou uso a tuāoi.
O le Maota Fono mautū lenei, e sufi ai manū mo Tutuila ma Manu’a, e ala i le Maota Mauāluga ma le Maota o Sui e afifio ai le Peresetene ma le Fofoga Fetalai.
O le ā tapena fa’aaloaloga masani fa’aleaganu’u e ala i Sua Ta’i ma le Ta’alolo a Samoa, o se fa’aaloalo mauāluga e fa’afetaia ai le amanaia e nai o tatou uso a tuāoi, o le tapuā’iga leoleoa a Samoa ma ona tagatānu’u.
Fa’ailoa e La’aulialemalietoa, e fa’atupe lava e le Mālō le aoao tetele o lenei tapenaga.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
