Taofia se Pepe 11 Masina i le Falemai Motootua, Masalomia e maua i le Misela

0
380
Motootua National Hospital. Photo: Samoa Global News.

E 11 masina o se pepe o loo taofia i le falemai i Motootua ma o loo masalomia e maua i le misela.

I se faatalatalanoaga ma le Ofisa Sili o le Matagaluega o le Soifua Maloloina le afioga Aiono Dr Alec Ekeroma, na ia faailoa ai, o se pepe sefulu ma le tasi masina na taofia i Motootua i le Aso Sa na sei mavae atu nei, ma o loo masalomia i a’afiaga o le misela.

“Peitai e lei faamaonia, o loo tālia samples o loo auina atu i Niu Sila pe faamaonia lea tulaga.”

Saunoa Aiono, o le Aso Faraile o le vaiaso na tea nei sa taofia ai foi se isi tamaititi, ma ua tuuina atu faatasi a lā’ua blood samples, e suesue i Niu Sila.

E toatolu foi nisi tamaititi na taofia mai le lua vaiaso talu ai, ae sa aumai faaiuga o suesuega mai Niu Sila, e lē o le misela na aafia ai i latou.

O Setema o le tausaga 2019 sa faateteleina ai le faamai o le misela i Samoa, ma e oo atu i le Aso 7 o Ianuary 2020, ua silia ma le toa 5,700 e sa aafia, ae toa 83 e na maliliu. O le toatele o e na maliliu, o le fanau iti i lalo mai o le 4 tausaga le matua.

O le mafuaaga na faateleina ai le misela i lena taimi, ona e na o le 31-34 pasene e sa maea o latou tui puipui. O se numera maualalo tele, ona o isi atunuu o le Pasefika lea sa leai nisi na maliliu ina ua sasao le misela, e oo atu i le 99% pasene le latou coverage.

Saunoa Aiono, o le taimi nei ei luga atu o le 82% le kava (coverage) o tui o le MMR1, ae 45% le coverage o le MMR2.

O le naunautaiga, ina ia ausia ma sili atu i le 85% tui nei e lua – MMR1 ma le MMR2.

“O le taimi nei e fa au poo teams o loo ua agai atu i tua mo le faasoloina atu o tui puipui o le misela..”

E faagalo gatā e le atunuu le tausaga 2019 lea sa faamauina ai le 83 o le aofai o fanau na fano ma maimau ai soifua ona o le misela. O le toatele o nisi maliu, e lei lipotiaina nai fanau sa maliliu lava i totonu o aiga.

E lei faamautu mai poo afea e maua mai ai le tali o samples o loo tuuina atu i Niu Sila.