Ua faamuta nei sailiga a le Matāgaluega o Leoleo mo le tamā matua ia Tautaifau Kipaoa Faavesi, 77 tausaga o Asau Savaii, lea ua silia nei ma le tolu vaiaso talu ona leiloa.
Na tā’ua e le Komesina o le Matāgaluega Leoleo, Auapaau Logoitino Filipo, sa telē se itu o le faatoaga faapea mauga lata ane sa oo iai le sailiga.
O le sailiga sa faatino e le Matāgaluega faapes le FESA, ae sa ō faatasi foi ma sui o le afioaga, peitai, e le’i manuia.
Sa fa’aogaina foi e le Matāgaluega masini pue ata faaonapo nei (drones) e fesoasoani ai i le galuega o le tau sailia lea o le tamā matua peitai, e le’i manuia.
“E oo foi i le afioaga i se latou fetufaiga, e matuā lē talitonu poo fea ua agai iai le tama matua.”
O le Aso Faraile 14 Aperila na alu ese atu ai Tautaifau Kipaoa Faavesi mai lo latou aiga i Asau, e usu i lana faatoaga. peitai, e po lava e lei toe foi ane lava o ia.
Saunoa Auapaau, o le ripoti a lo latou aiga, o lenei tamā e masani lava ia i le agai atu i lana maumaga i aso taitasi.
“E ui ina faamuta galuega saili a le Matāgaluega, ae o loo talia pea e le Matāgaluega soo se faamatalaga fou e tuuina mai mo lea mataupu.”
Ae o se isi foi tamā matua na taua e Auapaau Logoitino Filipo, o Laki Lui Samoata, 70 tausaga mai Vaitoloa, na leiloa mai lona aiga mai le Aso 24 o Aperila.
Faamaonia mai e le Komesina, o lea ua toe maua lenei tamā ma ua toe faatasi atu ma si ona aiga.
- Leai Se Sui o le Malo e Talia Saunoaga o le Savali O Le Filemu - December 8, 2023
- “Ua Tatau Ona Sii i le $5 i le Itula Totogi Amata o Tagata Faigaluega e Fua i le Tau o le Soifuaga ua iai nei - December 8, 2023
- Silia ma le $16,000 le Tau o Meatotino sa Gaoia mai le Maota o le Komesina o Tineimu - December 6, 2023
