Taofia pea se Tamā Tuuaia i Amioga Mataga agai i le Tama Teine a Lona Afafine

O lo’o taofia pea i lalo o le vaaiga a leoleo se tamā e 60 ma ona tupu tausaga le matua e tālia ai le Aso Gafua o le vaiaso fou, e toe fofogaina ai le mataupu i moliaga e silia ma le 20 lea o loo tuuaia ai e leoleo i ni amioga mataga, agai atu i le tama teine a lona afafine.

E pei ona fofogaina i luma o lana Afioga i le Fa’amasino Sili, Satiu Simativa Perese, na fa’aalia ai e le susuga i le alii loia o lo’o tula’i mo lē o lo’o molia ia Leinafo Taimalelagi, e mana’omia se avanoa e taga’i ai i moliaga, ma tu’uina atu ai loa se tali a lenei tama.

E lē o mafai ona fa’ailoaina le suafa o lenei tamā matua, ona o tulafono masani a le Fa’amasinoga Maualuga i le vavalalata tele o le so’otaga a le o lo’o molia, ma le teineititi o lo’o a’afia.

I tolaulauga o lenei mata’upu o lo’o tu’ua’ia ai lenei tama i moliaga e 20 o amioga mataga (indecent acts), ma o lo’o faapea na ia amata fa’atinoina mai i le va o le masina o Tesema 2016 se’ia o’o mai i le masina o Ianuari o le tausaga e 2018.

O le teineititi o lo’o a’afia e fa’apea o le tama teine a le afafine moni lava a le tamā lenei o lo’o molia (granddaughter).

O le vaiaso fou lea o le a toe fofogaina ai lenei mata’upu i luma o le Fa’amasinoga, ma tuuina mai ai loa le tali a lenei tama i ona moliaga.

(4)