Ua taofia nei e leoleo le tamaitai taufaavalea i galuega faavaitaimi, e suafa ia Lynn Nauer, ina ua valaau mai le afioaga o Laulii, o loo latou taofia lenei tamaitai.
Sa faamaonia mai e le Komesina o Leoleo Auapaau Logoitino Filipo, o se valaau mai le afioaga o Laulii, na faailoa mai ai lenei tamaitai o loo vaaia e le afioaga.
O lea na agai atu ai loa leoleo i le afioaga i le vaiaso talu ai ma taofia mai ai loa.
Saunoa manino Auapaau, o loo taofia nei e leoleo e talia ai le aso 25 o le masina nei e tali ai i ona moliaga o le taufaavalea, poo le obtaining by deception.
Ta’ua foi e Auapaau, “E valu ni tagi ua maea ona faaulu atu e faasaga i lea tamaitai i le moliaga lava lea o le taufaavalea, lona uiga e valu foi moliaga o le’a feagai ma Nauer.
Pei ona silafia o le vaiaso na mavae atu nei na faailoa mai ai e leoleo le tausailia o lea tamaitai ona o taufaasese i nisi o taulelea, i luga o galuega faavaitaimi.
Sa ia fai ia i latou nei, o ia e faigaluega i le ofisa o le Leipa a le Malo o loo gafa ma galuega faavaitimi, le MCIL.
Sa ia tafaavalea ma fai iai o loo tau sailia nisi mo lana aumalaga e lei taitai atoa. Na ia aoina mai ni seleni tupe e $500 mo i latou e le’i faia ni tusi folau ae $200 mai ia i latou ua ma’ea ona faia tusifolau.
Mulimuli ane e lua aso o agai pea nei alii na faaseseina e Nauer i le malae vaalele i Faleolo ae lēi iai ni o latou igoa i le lisi pasese o le vaalele.
Sa momoli mai le faafetai tele a le Komesina o le Matagaluega a Leoleo i le paia o le afioaga o Laulii ona o le lagolago mai ma le galulue faatasi ma le matagaluega ua faafaigofie ai le pito laau a leoleo.sa
(11)
