Ua foi mai leoleo sa o atu i Ausetalia e aumai lē o loo tuuaia i le taupulepule e faaoo le oti i lē sa avea ma Palemia o Samoa faapea lē sa avea ma Komesina o Leoleo.
Ua faamaonia mai nei e le Sui Komesina o Leoleo, afioga Papalii Monalisa Tia-Keti le toai taunuu mai o Talalelei Pauga i Samoa nei.
Sa latou taunuu mai ma alii Malu o le Malo poo sa malaga atu i Ausetalia e auina faapitoa mai Pauga (extradiction order).
O le vaevao nei sa taunuu mai ai le vaa tuusao mai Ausetalia, ma avatu ai loa Pauga i Tanumalala e nofo vaavaaia ai, ao talia le aso muamua e tulai ai i luma o le Faamasinoga.
O Talalelei Pauga o le isi lea e atoa iai le toafā o i latou sa taupulepule e faaoo le oti ia Tuilaepa Sailele Malielegaoi, faapea Fuiavailiili Egon Keil.
O Pauga foi lea sa ia togia Tuilaepa i se ulu puaa (sei tulou) ao fai se feiloaiga e faalauiloa ai le Samoa Airways.
O nisi sa latou taupulepule faatasi, o loo tuli nei a latou faasalaga i Tanumalala. E pei o Taualai Leiloa, 41, mai Magiagi ma Laulii, lea sa ia muamua lava ioeina moliaga ma tautino le latou taupulega.
O loo tuli nei lona faasalaga falepuipui mo le 5 tausaga. O Lema’i Sione o loo tuli nei le fa ma le afa tausaga, ae o Malele Paulo e fa tausaga sa tuuina mai e le Faamasinoga.
O le mau a le Faamasinoga i le tuuina mai o nei faasalaga, e le tuu mamaina e le Faamasinoga le soligatulafono o le taupule e faoo le oti, ae maise lava pe afai o se tasi o loo fai ma taitai o se atunuu faatemokarasi.
O loo faamauina i molimau a le Faamasinoga Maualuga, o Talalelei Pauga o loo tuuaia i lona faatupeina uma o fuafuaga, ma faatonuina mai Ausetalia gaioiga uma.
O le Aso Gafua o le a tulai ai Talalelei Pauga e tali atu i ona moliaga o le taupulepule e faaoo le oti.
