Ua taofia e leoleo se alii o loo masalomia sa ia faafoeina le taavale na mafua ai ona maliu se tamaitai Saina i le vavevao o le Aso Sa 25 Setema 2023.
Sa faamaonia mai e le Sui Komesina o Leoleo, Papalii Monalisa Tiai Keti e 38 tausaga o lenei alii mai le afioga o Malie.
“Na taofia mai e le matagaluega i le faaiuga o le vaiaso.”
O lenei faalavelave na tulai mai i le taeao o le Aso Sa talu ai i le auala o le Vaitele Street, e latalata i le pamu penisini i Vailoa.
Sa kolosi lenei tamaitai e fia agai atu i le mea o loo iai le au faatau i’a, ae lavea ai loa i se taavale.
O le tamaitai Saina ua maliu, sa fai lana fale aiga i Ululoloa, ae masani lava ona faatau i’a i vaveao o Aso Sa i lea itu o Vailoa.
E le’i tu lea taavale ae sa faasalalau mai i se pepa o faamatalaga a Leoleo, o se taavale paepae i le ituaiga o le Hyundai Getz sa masalomia i lenei faalavelave.
O le lua vaiaso talu ona tupu le faalavelave lea ua maua ai e leoleo se tasi o loo masalomia. O le Aso 16 o Oketopa, o le a tulai ai lea alii i luma o le Faamasinoga Maualuga e tali i ona moliaga o le ave taavale matautia ua mafua ai le maliu.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
