Ua Taofia e Leoleo Samuelu lea sa Tele ni Tuuaiga i ana Faasalalauga Faalauaitele

0
2333

O le taeao nei na taofia ai e leoleo le alii o Samuelu, lea sa ia faia ni faasalalauga e tuuaia ai le afioga ia Lealailepule Rimoni Aiafi, ma ia faapea mai sa togi tupe o ia e na te tagatavaleina nisi o Minisita o le Kapeneta.

Ua faamaonia mai e le Sui Komesina o le Matagaluega o Leoleo, ua pueina ma taofia mai e leoleo le alii o Samuelu.

E tolu suafa eseese e iloa ai lenei alii. O Samuelu Piki. O Sam Leau. O Fauega Leau.

Saunoa Papalii Monalisa Tiai Keti, na taofia mai e leoleo le alii o Samuelu mai se nofoaga i le taulaga.

O lea la o le’a fa’aauau iai suesuega a leoleo.

E tele tuuaiga matuia na aumai e Samuelu. E aofia ai lana mau, sa iai i Vaitele i le po lea sa maliu ai le atalii ia Tuuau Faasavalu i le po o le Aso Faraile 21 Aperila.

O le aso tonu lea o le faigapalota tele a Samoa lea sa le mautonu ai se Malo e tulai mai.

O Samuelu o se alii na ia faia ni faasalalauga faapea o ia sa vaai tino i le taimi na lavea ai le alii talavou ia Tuuau, ma sa ia molimauina vaega uma atoa ai ma lē sa ia faafoeina le taavale na lavea ai Tuuau.

O le isi tuuaiga a Samuelu. Sa ia faapea mai ai sa tuuina atu ia te ia e Lealailepule Rimoni Aiafi se laau malosi faatasi ai ma se tupe e totogi ai o ia, ma faatonu e na te tagatavaleina nisi o Minisita.

O Laaulialemalietoa Leuatea Polataivao Schmidt ma le afioga Olo Afoa Fiti Vaai sa tāuaina e Samuelu.

Sa tuuaia foi e Sam le Komesina o Leoleo le afioga ia Auapaau Logoitino Filipo i ni tuuaiga matuia i faiga faaalatua.

Peitai. Ina ua maea ona fai mai nei faasalalauga ma faatupuina le vevesi i le atunuu, sa fiu leoleo e su’e Sam ma talosagaina e afio atu e fai sana faamatalaga.

Peitai sa le mafai ona maua mai Samuelu. Ua le alu ane foi e vaai leoleo ae ua solasola solo.

Saunoa Papalii o le a faa’auau suesuega leoleo i lenei mataupu ona e ogaoga le faaleagaina o nisi o le mamalu o le atunuu, i faasalalauga a Samuelu.

Faasalalauga Tāua