Sa talosaga le sui faipule o Falealili le Afioga ia Fuimaono Sam Te’o, ina ia o gatasi le fesoasoani o loo tuuina atu mo noagatupe i Faletupe Tetele (commercial banks) ma Faletupe Laiti (Small Finanical Institution).
A o faagasolo lauga mo le Tala i le Tupe i le Palemene o Samoa, sa tulai ai Fuimaono ma faapea mai, o le toatele o le mamalu o le atunuu o loo faaogaina Fale Tupe laiti, ae le o Fale Tupe tetele.
O fuafuaga a le Malo o loo aumai i le Tala o le Tupe, o loo tā’ua ai se 2 pasene e faamatuu atu i Commercial Banks e faamamaavega ai mo i latou o loo totogi aitalafu, ae peitai, sa saunoa mai Fuimaono o loo tele ina agai tagata i Faletupe Laiti, e fai aitalafu pe a tupu mai faalavelave i aiga.
“E 2% o loo faasafua ia tatou Commercial Banks, e talitonu le mafaufau e ta’u loa Commercial Banks na o i latou e iai aseta tetele, lea e ave iai le faamanuiaga lea. Sei toe silasila lava o lea e iai nai a tatou finanancial institutes;
“O nai kamupani na, e tele ina oso iai le au faigaluega pe a sau le faalavelave faafuase’i, e aumai le $500, e aumai le $800…, pe le o’o iai lau silasila faamolemole, ma faasafua iai le tamaoaiga lea.”
Faaitiitia Tului
O se manatu sa taotaotua mai ai ma le talosaga i se auala e faatonutonu ai le tului a faletupe laiti ia. O le faataitaiga e pei ona tuuina mai e le Sui Faipule – o le aitalafu e $1000 ae o le tului ua 21%. Ua taugata tele ia tului, ma e umi ai foi ona totogi ma ua atili ai ona mafatia le tagata aitalafu.
Na suesue atu e le Samoa Global News ni Faletupe Laiti se toalua, poo lea le tau poo le rate o le tului a latou nonogatupe, ona e tele ina lē fesili le mamalu o le atunuu i ia tulaga. Aua foi o loo mua na manao e vave maua le seleni mo le faalavelave.
E leisi sa taua mai 20%, ae o le isi sa faapea mai e 16%, ma e amata mai lava i le nonogatupe maulalo e $500 tala. Mo le loan e $500, sa taua o repayments ei le va o le $75 ma le $80 tala i le tai lua vaiaso.
O le tapulaa e gata mai ai le tele o le nonogatupe i Faletupe Laiti e tusa lea ma le $5000 tala.
Sa latou taua mai foi, e faaopoopo iai ma le fee o le faagaioiina o le nonogatupe, ma e fua lava le fee i le tele o le loan. A tele le loan ua siisii foi lena o le fee. E vave foi ona faagaioi ma e tasi lava le aso e faatali ai se nonogatupe ma ia financial institutes.
O le tausaga lea na tea i le masina foi o Iuni sa laga ai foi e le Taitaifono o le Komiti o Tupe a le Palemene, le Afioga ia Ali’imalemanu Alofa Tuuau le tagai i tului o loo faamatuu atu i nonogatupe laiti.
Sa faasalalauina ai e le Minisita o Tupe i lena foi taimi, se taumafaiga o le a agai ati iai le Malo, e faaitiitia tului o loo faamatuu atu e Faletupe Laiti.
(0)
